ஆப்கானிஸ்தான் கிரிக்கெட் அணியை சிறந்த அணியாக மாற்றுவதற்கு உதவியாக இருப்பேன் என்று அந்த அணியின் புதிய பயிற்சியாளராக நியமிக்கப்பட்டுள்ள லான்ஸ் குளுஸ்னர் தெரிவித்துள்ளார்.
ஆப்கானிஸ்தான் கிரிக்கெட் அணியின் பயிற்சியாளராக சிம்மன்ஸின் பதவி காலம் உலகக் கோப்பையுடன் முடிவடைந்ததை அடுத்து புதிய பயற்சியாளர் பணிக்கான விண்ணப்பங்கள் கோரப்பட்டிருந்தன. வரப்பட்ட 50 விண்ணப்பங்களில், தென்னாப்பிரிக்க அணியின் ஆல்ரவுண்டர் குளூஸ்னர் புதிய தலைமை பயிற்சியாளராகத் தேர்வு செய்யப்பட்டுள்ளார்.
2020-ம் ஆண்டு வரை அவர் இந்த தலைமைப் பயிற்சியாளர் பதவியில் இருப்பார். பிறகு அணியின் செயல்பாட்டின் அடிப்படையில் அவரது ஒப்பந்தத்தை நீட்டிப்பது குறித்து முடிவு செய்யப்படும்.
குளுஸ்னர் கூறும்போது, ‘சர்வதேச கிரிக்கெட்டில் திறமையான வீரர்களை கொண்ட அணியின் பயிற்சியாளராக நியமிக்கப்பட்டிருப்பதை பெருமையாகக் கருதுகிறேன். கடுமையான பயிற்சி முலம் உலகின் சிறந்த அணியாக ஆப்கான் அணியை மாற்ற முடியும் என்று நம்புகிறேன். அவர்களின் கிரிக்கெட்டை அடுத்தக்கட்டத்துக்கு கொண்டு செல்வதற்கு உதவியாக இருப்பேன்’ என்று தெரிவித்துள்ளார்.