உத்தரபிரதேசத்தில் நாக்வா கிராமத்தைச் சேர்ந்த அவதேஷ், திருமணத்தில் மணமகள் வீட்டார் வழங்கிய ரூ.31 லட்சம் வரதட்சணையை மறுத்து, 1 ரூபாய் மட்டுமே பெற்றுக்கொண்டார். வரதட்சணை முறையை எதிர்த்து எடுத்த இந்த முடிவு, இருவீட்டாரையும் நெகிழச்சியடையச் செய்ததுடன், சமூக வலைதளங்களில் பெரும் பாராட்டைப் பெற்றுள்ளது.
நாடு முழுவதும் அனைத்து தரப்பு பெண்களும் வரதட்சணை கொடுமைகளுக்கு ஆளாகும் நிலையில், கல்வியறிவு பெற்ற இளைஞர்கள் கூட வரதட்சணை கொடுமைக்கு துணைபோவது அதிர்ச்சி அளிக்கும் செய்திகளாக இருக்கின்றன. வரதட்சணை கொடுமையால் ஏற்படும் மரணச் செய்திகளும் அதிர வைப்பதாக இருக்கின்றன.
இப்படியான சூழலில் உத்தரபிரதேசத்தில் மணமகள் வீட்டார் கொடுத்த 31 லட்சம் ரூபாய் வரதட்சணையை வாங்க மறுத்து 1 ரூபாய் மட்டுமே பெற்றுக்கொண்ட மணமகனின் செயல் எல்லோராலும் பாராட்டப்பட்டு வருகிறது..
உத்தரபிரதேசத்தில் நாக்வா என்ற கிராமத்தைச் சேர்ந்த அவதேஷ் என்ற இளைஞருக்கும், ஷாஹாபதீன்பூர் கிராமத்தைச் சேர்ந்த அதிதி சிங் என்ற பெண்ணிற்கும் இடையே கடந்த 22ஆம் தேதி திருமணம் நடந்துள்ளது..
முசாபர்நகரில் உள்ள திருமண மண்டபத்தில் நடைபெற்ற திருமண விழாவின் போது வரதட்சணையாக மணமகனிடம் ரூபாய் 31 லட்சம் தொகையை மணமகள் வீட்டார் கொடுத்துள்ளனர்.. அதை அப்போதே இருவீட்டார் முன்னிலையில் வாங்க மறுத்த அவதேஷ், இருகரம் கூப்பி அவரின் கோரிக்கையை ஏற்றுக்கொள்ளுமாறும் கூறினார்.. பின்னர் 31 லட்ச ரூபாயை வாங்க மறுத்த அவர், மணமகள் வீட்டாரிடமிருந்து 1 ரூபாயை மட்டும் மடியில் வாங்கிக்கொண்டார்.. மணமகனின் இந்தசெயல் குழுமியிருந்த இருவீட்டாரையும் நெகிழ்ச்சியடைய செய்தது..
பின்னர் வரதட்சணை வாங்க மறுத்தது குறித்து பேசியிருக்கும் அவர், “நான் நாக்வாவில் வசிப்பவன். எனது திருமணம் முசாபர்நகரின் ஷாஹாபுதீன்பூரில் நடந்தது, அவர்கள் எனக்கு ரூ.31 லட்சத்தை வரதட்சணையாகக் கொடுத்தார்கள். வரதட்சணை முறையை நாங்கள் எதிர்ப்பதால் அதைத் திருப்பித் தந்தோம். இது முற்றிலும் தவறு. வரதட்சணை முறையை முற்றிலுமாக நிறுத்த வேண்டும். எந்தவொரு தந்தையும் தனது மகளை திருமணம் செய்து வைப்பதற்காக வாழ்நாள் முழுவதும் போராடவோ அல்லது கடன் வாங்கவோ வேண்டியதில்லை” என கூறியுள்ளார். இவரின் இந்த செயல் சமூகவலைதளங்களில் தொடர்ந்து பாராட்டப்பட்டு வருகிறது..