பிரெண்ட் கச்சா எண்ணெய் விலை 111 டாலர்களைத் தாண்டியுள்ள நிலையில், ரஷ்யக் கச்சா எண்ணெய் மீதான விலக்கு காலக்கெடுவை அமெரிக்கா ஒரு மாதத்திற்கு நீட்டித்துள்ளது. இந்தியாவின் மீதான அழுத்தத்தைக் குறைக்கவும், பெட்ரோல் மற்றும் டீசல் விலையில் ஏற்படக்கூடிய மற்றொரு உயர்வைத் தடுக்கவும் இந்த நடவடிக்கை உதவக்கூடும்.
மேற்கு ஆசியாவில் நிலவும் பதட்டங்கள் மற்றும் உலகின் முக்கிய எரிசக்தி போக்குவரத்து பாதையான ஹார்முஸ் ஜலசந்தியில் ஏற்பட்டுள்ள இடையூறுகள் காரணமாக உலகளவில் கச்சா எண்ணெய் விநியோகம் பாதிக்கப்பட்டுள்ளது. பெஞ்ச்மார்க் பிரென்ட் கச்சா எண்ணெய் ஒரு பீப்பாய் 111 டாலராக உயர்ந்துள்ளது. உயர்ந்து வரும் கச்சா எண்ணெய் விலைகள் ஏற்கனவே உலகெங்கிலும் உள்ள எரிபொருள் சில்லறை விற்பனையாளர்கள் மற்றும் நுகர்வோர் மீது அழுத்தத்தை ஏற்படுத்தியுள்ளது.
புவிசார் அரசியல் பதட்டங்களால் ஏற்பட்ட விநியோகப் பற்றாக்குறையைச் சமாளிப்பதற்காக ரஷ்யாவிடமிருந்து எண்ணெய் வாங்குவதற்கான அனுமதியை முதன்முதலில் மார்ச் மாதம் அளித்தது அமெரிக்கா. மேலும் ஏப்ரல் மாதத்தில் அது ஒருமுறை நீட்டிக்கப்பட்டது.
இதனைத் தொடர்ந்து தற்போது ரஷ்யாவிடமிருந்து கடல்வழியாக எண்ணெய் வாங்குவதற்கான தடைக்கால விலக்கை அமெரிக்கா மேலும் 30 நாட்களுக்கு நீட்டித்துள்ளது.
செலவுகளைச் சமாளிப்பதற்காக சுத்திகரிப்பு ஆலைகள் தள்ளுபடி விலையில் கிடைக்கும் ரஷ்ய கச்சா எண்ணெயைத் தொடர்ந்து பெருமளவில் சார்ந்து இருப்பதால், இந்தியாவைப் பொறுத்தவரை இந்த நீட்டிப்பு முக்கியத்துவம் வாய்ந்தது. பெட்ரோல் மற்றும் டீசல் விலைகள் லிட்டருக்கு கிட்டத்தட்ட ரூ.4 உயர்த்தப்பட்ட நிலையில், உள்நாட்டு எரிபொருள் விலைகள் மீதான அழுத்தத்தைக் குறைக்க உதவும் என்று தொழில்துறை வல்லுநர்கள் நம்புகின்றனர்.
அமெரிக்காவின் இந்த நடவடிக்கை உலகளாவிய எண்ணெய் சந்தைகளுக்கு தற்காலிக நிவாரணம் அளிப்பதோடு, இந்தியா மற்றொரு கடுமையான எரிபொருள் விலை உயர்வைத் தவிர்க்க உதவும் எனவும் கூறப்படுகிறது.
Kpler தரவுகளின்படி, இந்தியா மார்ச் மாதத்தில் ஒரு நாளைக்கு கிட்டத்தட்ட 2 மில்லியன் பீப்பாய்கள் ரஷ்ய கச்சா எண்ணெயையும், ஏப்ரல் மாதத்தில் ஒரு நாளைக்கு 1.6 மில்லியன் பீப்பாய்கள் ரஷ்ய கச்சா எண்ணெயையும் இறக்குமதி செய்தது.