மத்தியில் ஆட்சியை பிடித்தாலும் மாநிலங்களில் ஆட்சிகளை இழக்கும் பாஜக..?

மத்தியில் மீண்டும் ஆட்சியைப் பிடித்தாலும், கடந்த இரண்டு ஆண்டுகளில் கணிசமாக மாநில ஆட்சிகளை பாரதிய ஜனதா கட்சி இழந்துள்ளது. அதன் விவரத்தைப் தெரிந்துக்கொள்ளலாம்.

2017-ஆம் ஆண்டு நிலவரப்படி, பாரதிய ஜனதா கட்சி மகாராஷ்டிரா, குஜராத், ராஜஸ்தான், மத்திய பிரதேசம், உத்தரப் பிரதேசம், சத்திஷ்கர், இமாச்சலப் பிரதேசம் ஆகிய மாநிலங்களில் ஆட்சியில் இருந்தது. ஜம்மு காஷ்மீர், பீகார், ஆந்திரா ஆகிய மாநிலங்களில் கூட்டணி ஆட்சியில் பாரதிய ஜனதா இருந்தது. அசாம் உள்ளிட்ட வடகிழக்கு மாநிலங்கள் பெரும்பாலான மாநிலங்களில் தனியாகவோ, கூட்டணியிலோ பாஜக ஆட்சியில் இருந்தது. 

அதாவது, 2017 நிலவரப்படி, இந்தியாவின் மொத்த பரப்பில் 71 சதவிகித பரப்பளவில் மாநில ஆட்சியில் பாரதிய ஜனதா இருந்தது. ஆனால், 2 ஆண்டுகளுக்குப் பிறகு இப்போது, பல மாநிலங்களில் பாஜக ஆட்சியை ‌இழந்திருக்கிறது. ராஜஸ்தான், மத்திய பிரதேசம், சத்தீஷ்கரில் ஆட்சியை இழந்த அக்கட்சி, மகாராஷ்டிராவிலும் இப்போது ஆட்சியை இழந்துள்ளது. ஆந்திரா, ஜம்மு காஷ்மீர் ஆகிய மாநிலங்களில் கூட்டணியை இழந்தது. மாறாக, கர்நாடகாவில் மட்டும் அக்கட்சி ஆட்சியைப் பிடித்துள்ளது. 

வடகிழக்கு மாநிலங்களில் ஆட்சியை அக்கட்சி தக்கவைத்துள்ளது. தற்போதைய நிலவரப்படி, நாட்டின் மொத்த பரப்பில் பாஜக வசமுள்ள மாநில ஆட்சிகளின் பங்கு 40 சதவிகிதமாக சரிந்துள்ளது. இதனால், இந்திய வரைபடத்தில் பாஜக அல்லாத கட்சிகள் ஆட்சி செய்யும் மாநிலங்களும் பரப்பளவும் கணிசமாக அதிகரித்திருக்கிறது. மத்தியில் இரண்டாவது முறையாக ஆட்சியைப் பிடித்தாலும் மாநிலங்களில் பாரதிய ஜனதாவின் செல்வாக்கு சரிந்து வருவதே வரைபடம் கூறும் தகவலாக இருக்கிறது.