60 நாள் போர் நிறுத்தத்திற்கு அழைப்பு விடுத்த ட்ரம்ப். காஸாவில் முழுமையாக தாக்குதல் நிறுத்தப்பட்டால் ஒப்பந்தத்திற்கு தயார் என ஹமாஸ் அறிவிப்பு.
அரசுமுறைப் பயணமாக மேற்கு ஆப்ரிக்க நாடான கானா சென்றார் பிரதமர் மோடி. அந்நாட்டின் உயரிய விருதை வழங்கி கவுரவித்தார் அதிபர் மஹாமா.
நேஷனல் ஹெரால்டு வழக்கில் 2 ஆயிரம் கோடி ரூபாய் முறைகேடு. சோனியா காந்தி, ராகுல் காந்தி மீது அமலாக்கத் துறை குற்றச்சாட்டு.
அஜித்குமார் கொலை வழக்கு தொடர்பாக நீதி விசாரணையை தொடங்கிய மதுரை மாவட்ட நீதிபதி ஜான் சுந்தர்லால். கோயில் நிர்வாகிகள், சம்பவத்தை நேரில் பார்த்தவர்கள் உள்ளிட்டோரிடம் 11 மணி நேரத்துக்கும் மேலாக விசாரணை.
காவல்துறையினரால் கொலை செய்யப்பட்ட இளைஞர் அஜித்குமாரின் தம்பிக்கு ஆவின் நிறுவனத்தில் டெக்னீசியன் பணி. 5 லட்சம் ரூபாய் இழப்பீடு, இலவச வீட்டுமனைப் பட்டா வழங்கி அமைச்சர் பெரியகருப்பன் ஆறுதல்.
இளைஞர் கொலை வழக்கில் நீதி கிடைக்கும் வரை அதிமுக துணை நிற்கும் என காவல் விசாரணையில் அடித்துக் கொல்லப்பட்ட அஜித்குமாரின் குடும்பத்தினருக்கு பழனிசாமி ஆறுதல்.
சாத்தான் வேதம் ஓதுவதுபோல பழனிசாமி பேசி இருப்பதாக ஆர்.எஸ். பாரதி விமர்சனம். சாத்தான்குளம் சம்பவத்தில் இருவருமே உடல்நலக்குறைவால் இறந்தார்கள் என்று பேசியபோது நீதி எங்கே போனது என்றும் கேள்வி.
காவல் துறையால் கொல்லப்பட்ட இளைஞர் அஜித் குடும்பத்தை நேரில் சந்தித்து தவெக தலைவர் விஜய் ஆறுதல். இளைஞரின் குடும்பத்துக்கு நிதி உதவியும் வழங்கினார்.
இளைஞர் அஜித் மீது புகாரளித்த நிகிதா, லட்சக்கணக்கில் பண மோசடி செய்ததாக 2011இல் வழக்குப்பதிவு. துணை முதல்வரின் உதவியாளரைத் தங்களுக்குத் தெரியும் என மோசடியில் ஈடுபட்டதாக புகார்.
தமிழக காவல் துறையில் உள்ள அங்கீகரிக்கப்படாத தனிப்படைகள் கலைப்பு. இளைஞர் அஜித்குமாரை தனிப்படை காவலர்கள் அடித்துக் கொன்ற சம்பவத்தை அடுத்து நடவடிக்கை.
பல ஆண்டுகால வன்மத்தின் வடிகாலாக தம்மீது அவதூறு பரப்புகிறார்கள். அறநிலையத்துறை சார்பில் 32 ஜோடிகளுக்கு திருமணம் செய்து வைக்கும் விழாவில் முதல்வர் ஸ்டாலின் விமர்சனம்.
வரும் 21ஆம் தேதி தொடங்குகிறது நாடாளுமன்ற மழைக்கால கூட்டத் தொடர். ஆகஸ்ட் 21ஆம் தேதி வரை நடைபெறும் என அறிவிப்பு.
ஓலா, ஊபர் வாடகை கார் கட்டணங்கள் உயர்கின்றன. பீக் அவர் நேரங்களில் 2 மடங்கு வரை கட்டணம் உயர்த்த மத்திய அரசு அனுமதி.
வங்கதேச முன்னாள் பிரதமர் ஷேக் ஹசீனாவுக்கு 6 மாத சிறை. நீதிமன்ற நடவடிக்கைகளை தடுக்கும் வகையில் செயல்பட்ட வழக்கில் சர்வதேச குற்றவியல் தீர்ப்பாயம் உத்தரவு.
சென்னையில் திருவொற்றியூரில் சாலையில் தேங்கிய மழைநீரில் மின்சாரம் பாய்ந்து பள்ளி மாணவன் உயிரிழப்பு. மின்வாரியத்தைக் கண்டித்து சாலை மறியலில் ஈடுபட்ட பொதுமக்கள்.
நடிகர் ஸ்ரீகாந்த் தொடர்புடைய போதைப்பொருள் வழக்கில் 4 பேருக்கு போலீஸ் காவல். நுங்கம்பாக்கம் காவல் நிலையத்தில் வைத்து போலீஸார் தீவிர விசாரணை.
இங்கிலாந்துக்கு எதிரான 2ஆவது டெஸ்ட் கிரிக்கெட்டின் முதல் நாள் முடிவில் வலுவான நிலையில் இந்தியா. சுப்மன் கில்லின் அபார சதத்தால் 5 விக்கெட் இழப்புக்கு 310 ரன்கள் குவிப்பு.