இந்திய முஸ்லிம்கள் அஞ்சத் தேவையில்லை - அமித் ஷா

குடியுரிமை மசோதா மக்களவையில் நிறைவேறிய நிலையில் அடுத்து மாநிலங்களவையின் ஒப்புதல் பெற அம்மசோதா தாக்கல் செய்யப்பட்டுள்ளது. மசோதாவை தாக்கல் செய்து பேசிய உள்துறை அமைச்சர் அமித் ஷா, இந்தியாவில் உள்ள முஸ்லிம்கள் குடியுரிமை மசோதா குறித்து எவ்விதத்திலும் அஞ்சத் தேவையில்லை என்று குறிப்பிட்டார். 

இந்திய முஸ்லிம்கள் தொடர்ந்து இந்திய குடிமகன்களாகவே நீடிப்பார்கள் என்றும் அவர் தெரிவித்தார். இம்மசோதா குறித்து முஸ்லிகள் மத்தியில் தேவையற்ற அச்ச உணர்வுகள் பரப்பப்பட்டு வருவதாகவும் அமித் ஷா குற்றஞ்சாட்டினார். பாகிஸ்தானிலும் வங்கதேசத்திலும் பெரும்பான்மையாக உள்ள முஸ்லிம் மக்கள் இந்தியா வந்தால் அவர்களுக்கு நம் நாட்டு குடியுரிமை தருவது எந்த வகையில் சரியாக இருக்கும் என்றும் அமித் ஷா கேள்வி எழுப்பினார். 

அண்டை நாடுகளில் இருந்து இந்தியா வந்துள்ள சிறுபான்மையின மக்களுக்கு நம் நாட்டில் கல்வி, வேலைவாய்ப்பு உள்ளிட்ட அம்சங்களை உறுதிப்படுத்தவே இம்மசோதா கொண்டு வரப்பட்டுள்ளதாக உள்துறை அமைச்சர் கூறினார்.