2027 ஆகஸ்ட் 2 அன்று வட ஆப்பிரிக்கா, ஐரோப்பா, மத்திய கிழக்கின் சில பகுதிகளில் நூற்றாண்டு காணாத நீண்ட முழு சூரிய கிரகணம் நிகழ உள்ளது. அட்லாண்டிக் கடலில் தொடங்கி எகிப்தின் லக்சர் வரை நீளும் பாதையில் 6 நிமிடம் 23 விநாடி முழு கிரகணம் தென்படும். நாசா தகவல்படி 2114 வரை இத்தகைய நீளமான கிரகணம் இல்லை. இந்தியா, தமிழ்நாட்டில் பகுதி கிரகணமே தெரியும்.
செய்தியாளர் : ஐடா அருட்செல்வி
2027 ஆகஸ்ட் 2-ம் தேதி, வட ஆப்பிரிக்கா, ஐரோப்பா மற்றும் மத்திய கிழக்கின் சில பகுதிகளில் முழு சூரிய கிரகணம் நிகழ உள்ளது. இதில், லக்சர் அருகே அதிகபட்சமாக 6 நிமிடங்கள் 23 விநாடிகள் முழு கிரகணத்தை காண முடியும். நாசாவின் தகவல்படி, 2114-ம் ஆண்டு வரை உலகில் வேறு எந்த இடத்திலும் இத்தனை நீண்ட முழு சூரிய கிரகணம் காணப்படாது.
அட்லாண்டிக் கடலில் தொடங்கும் கிரகணப் பாதை ஸ்பெயின், ஜிப்ரால்டர், மொராக்கோ வழியாக அல்ஜீரியா, துனிசியா, லிபியா, எகிப்து, சவுதி அரேபியா, ஏமன் மற்றும் சோமாலியா வரை நீள்கிறது. சுமார் 259 கி.மீ. அகலம் கொண்ட இந்தப் பாதையில் காடிஸ், டாங்கியர், ஓரான், பெங்காசி, ஜெட்டா உள்ளிட்ட முக்கிய நகரங்களும் இடம்பெறுகின்றன.
ஆனால், மன்னர்களின் பள்ளத்தாக்கும், ராணிகளின் பள்ளத்தாக்கும் சூழ்ந்துள்ள லக்சர், கிரகணத்தை காண மிகச் சிறந்த பின்னணியை வழங்கும் என வானியலாளர்கள் கூறுகின்றனர்.
அன்றைய தினம் காலை 11.40 மணியளவில் பகுதி கிரகணம் தொடங்கி, மதியம் 1.05 மணிக்கு முழு கிரகணத்தை அடையும். கோடையில் லக்சரின் வெப்பநிலை 41 டிகிரி செல்சியஸைத் தாண்டும் என்பதால், வெப்பமும் தூசியும் சவாலாக இருக்கும்.
இதற்கிடையில், கிரகணத்தை காண உலகம் முழுவதும் இருந்து லட்சக்கணக்கானோர் வருவார்கள் என எதிர்பார்க்கப்படுகிறது. இதனால் ஹோட்டல்கள் முன்பதிவு செய்யப்படுவதுடன், தங்குமிடக் கட்டணங்களும் கடுமையாக உயர்ந்துள்ளன. வானியல் சுற்றுலாவுக்கு ஆப்பிரிக்கா முக்கிய இடமாக உருவாகி வரும் நிலையில், 2027-ம் ஆண்டின் இந்த அரிய கிரகணம் உலகின் கவனத்தை எகிப்தின் லக்சர் மீது திருப்பியுள்ளது.
2027 ஆகஸ்ட் 2-ம் தேதி நிகழவிருக்கும் சூரிய கிரகணம் இந்தியாவிலும் தெரிய வாய்ப்புள்ளதாக கூறப்படுகிறது. ஆனால் முழு கிரகணம் இல்லை; தமிழ்நாடு உள்ளிட்ட பகுதிகளில் பகுதி கிரகணமாக மட்டுமே காணப்படக் கூடும். முழு கிரகணத்தை காண எகிப்து உள்ளிட்ட நாடுகளுக்குச் சென்றால் மட்டுமே அது சாத்தியம்.