சென்னை: சிசிடிவி காட்சியில் சிக்கிய பைக் கொள்ளையர்கள்; 8 வாகனங்கள் பறிமுதல்

சென்னையில் இருசக்கர வாகனங்களை திருடிய ஐந்துபேர் கைது செய்யப்பட்டனர். அவர்களிடம் இருந்து 9 லட்சம் ரூபாய் மதிப்பிலான எட்டு வாகனங்கள் மீட்கப்பட்டன.

சென்னை, காரப்பாக்கம் லட்சுமி விநாயகர் தெருவில் தங்கும் விடுதி உள்ளது. அதில், சர்ஜான் ஜார்ஜ், (25) என்பவர் தங்கி தனியார் நிறுவனத்தில் வேலை பார்த்து வருகிறார். இவர், கடந்த, 24ஆம் தேதி தனது இருசக்கர வாகனத்தை விடுதி முன்பு நிறுத்தியிருந்தார். அந்த வாகனம் திடீரென மாயமானது.

இது குறித்த ஜார்ஜ் காவல்நிலையத்தில் புகார் அளித்தார். அந்த புகாரின் அடிப்படையில், கண்ணகிநகர் போலீசார் விசாரணை நடத்தி வந்தனர். இதனையடுத்து கண்காணிப்பு கேமராவில் பதிவான காட்சியை ஆய்வு செய்ததில், இருசக்கர வாகனங்களை திருடியது கண்ணகி நகரைச் சேர்ந்த அஜய் (19), சூர்யா (20), பிரித்திவிராஜ் (19), சேவியர் (23), பிரதீப்ராஜ் (19), ஆகியோர் என்பது தெரியவந்தது.

விசாரணையில் இவர்கள், கண்ணகிநகர், மயிலாப்பூர், கோட்டூர்புரம், செம்மஞ்சேரி, மடிப்பாக்கம் ஆகிய பகுதிகளில் இருசக்கர வாகனங்களை திருடியதும் தெரியவந்தது. அவர்களிடம் இருந்து, ஒன்பது லட்சம் ரூபாய் மதிப்புள்ள எட்டு இருசக்கர வாகனங்கள் மீட்கப்பட்டன. பின்னர் ஐவரும் கைது செய்யப்பட்டு நீதிமன்ற உத்தரவுபடி சிறையில் அடைக்கப்பட்டனர்.