மாஸ்டர் படம் வெற்றியடைய வேண்டுதல்: திருவண்ணாமலை கோயிலில் வழிபட்ட லோகேஷ், அனிருத்!

விஜய்யின் மாஸ்டர் படம் வெற்றியடைய வேண்டும் என  மாஸ்டர் படக்குழு திருவண்ணாமலை அருணாச்சலேஸ்வரர் கோயிலுக்கு சென்று வழிபாடு செய்துள்ளது

விஜய் நடிப்பில் இயக்குநர் லோகேஷ் கனகராஜ் இயக்கத்தில் பொங்கலுக்கு வெளியாக இருக்கும் திரைப்படம் ‘மாஸ்டர்’.இந்த திரைப்படத்தில் விஜய்க்கு வில்லனாக விஜய் சேதுபதி நடிக்கிறார். ரசிகர்கள் மத்தியில் அதிகளவு எதிர்பார்ப்பை ஏற்படுத்தியிருக்கும் இந்தத் திரைப்படத்தின் டீஸரானது கடந்த ஆண்டு நவம்பர் 14 ஆம் தேதி வெளியிடப்பட்டது. பட வெளியீடு நெருங்கியதையடுத்து மாஸ்டர் படக்குழு சமீபத்திய சில நாட்களாக படத்தின் ப்ரோமா காட்சிகளை வெளியிட்டு வருகிறது.

அண்மையில் வெளியான ப்ரோமாக்களில் விஜய் மற்றும் விஜய்சேதுபதி பேசிய வசனங்கள் கவனம் ஈர்த்தன. இந்நிலையில் தற்போது மாஸ்டர் படம் வெற்றியடைய வேண்டும் என வேண்டி மாஸ்டர் படக்குழு திருவண்ணாமலை அருணாச்சலேஸ்வரர் கோயிலுக்கு சென்றிருக்கிறது.இது தொடர்பான புகைப்படத்தை மாஸ்டர் படத்தின் இயக்குநர் லோகேஷ் கனகராஜ், இசையமைப்பாளர் அனிருத் ஆகியோர் அவர்களது  ட்விட்டர் பக்கத்தில் வெளியிட்டுள்ளனர். 

அந்தப் புகைப்படத்தில் இசையமைப்பாளர் அனிருத், இயக்குநர்கள் லோகேஷ் கனகராஜ், இயக்குநர் ரத்னா, விஜயின் மேலாளர் ஜெகதீஷ், நடிகர் அர்ஜூன் தாஸ் உள்ளிட்டோர் உள்ளனர். இந்தப் புகைப்படம் தற்போது சமூகவலைதளங்களில் வைரலாகி வருகிறது.