''என் மீம்களை பார்த்து வெடித்து சிரித்தேன்'' - மாளவிகா மோகனன்

இணையத்தில் வைரலாகும் தன்னுடைய மீம் குறித்து மாளவிகா மோகனன் கருத்து தெரிவித்துள்ளார்

ரஜினியின் ‘பேட்ட’ படம் மூலம் தமிழில் அறிமுகமாகிய மாளவிகா மோகனன், தனது இரண்டாவது படத்திலேயே விஜய்க்கு ஜோடியாக ‘மாஸ்டர்’ படத்தில் ஒப்பந்தமாகி நடித்து முடித்தார். மாஸ்டர் பொங்கலுக்கு ரிலீசான நிலையில் தன்னுடைய மூன்றாவது படத்தில் தனுஷுடன் இணைந்துள்ளார். மாஸ்டர் படத்தில் மாளவிகா காதாபாத்திரம் பெரிதும் எதிர்பார்க்கப்பட்ட நிலையில் அவருக்கு பெரிய இடம் தரப்படவில்லை.

இந்நிலையில் அவரது புகைப்படம் சில தினங்களாக மீம் டெம்பிளேட்டாக வந்து இணையத்தில் வைரலாகியது. மாளவிகாவின் எக்ஸ்பிரஷனை பல்வேறு மீம்களாக உருவாக்கினர் மீம் கிரியேட்டர்ஸ். தற்போது அந்த மீம்கள் மாளவிகாவின் பார்வைக்கே சென்றுள்ளது.

இது குறித்து பதிவிட்டுள்ள மாளவிகா மோகனன் ''என்னுடைய மீம் என் பார்வைக்கு சிறிது தாமதமாக வந்துள்ளது. சில மீம்கள் என்னை வெடித்து சிரிக்கவைத்தது. குறிப்பாக பல் துலக்குவது போன்ற மீமை பார்த்து கடுமையாக சிரித்தேன். உங்களைப் பார்த்து சிரிக்க முடியாவிட்டால் வாழ்க்கை மிகவும் சலிப்பானது தானே? சரியா?'' என பதிவிட்டுள்ளார். மீம்களை பாசிட்டிவாக எடுத்துகொண்ட மாளவிகாவுக்கு பாராட்டுகள் என பலரும் கருத்துகளை பதிவிட்டு வருகின்றனர்.