இஸ்ரேல் - ஹமாஸ் இடையிலான போர் 7வது நாளாக நீடிக்கிறது. ஹமாஸ் அமைப்பினர் கடந்த 7ஆம் தேதி இஸ்ரேல் மீது திடீரென தாக்குதல் நடத்தி, 5 ஆயிரத்துக்கும் மேற்பட்ட ராக்கெட்டுகளை வீசித் தாக்கினர். அதன்பின்னர் இஸ்ரேல் அதிகாரபூர்வமாக போர் பிரகடனம் செய்து பதில் தாக்குதல் நடத்தி வருகிறது. இதில் பலர் உயிரிழந்துள்ளனர். ஆயிரக்கணக்கானவர்கள் படுகாயம் அடைந்து உள்ளனர்.
இந்த நிலையில், இஸ்ரேல் ராணுவம், விமானம் மூலம் ஹமாஸின் சுரங்கப்பாதை இருக்கும் பகுதிகளைக் குறி வைத்து தாக்குதல் நடத்தி வருவதாகவும் ஹமாசின் ஆயுதக் கிடங்குகளையும் சுரங்கப் பாதைகளையும் முற்றிலும் அழிப்பதே தங்களின் அடுத்தகட்ட நடவடிக்கையாக இருக்கும் என இஸ்ரேலிய பாதுகாப்புத்துறை அமைச்சர் தெரிவித்துள்ளார். ஹமாசின் பாதாள உலகம் வலைய அமைப்பு அவர்களுக்கு மட்டுமே தெரிந்தது என்பதால் இஸ்ரேலால், அனைத்து சுரங்க பாதைகளையும் உடனடியாக அழித்து விட முடியுமா என்பது கேள்விக்குறிதான். ஹமாஸின் சுரங்கப்பாதை குறித்து இங்கு அறிவோம்.
1987-ல் சுதந்திர பாலஸ்தீனம் என்ற கோரிக்கையை வலியுறுத்தி தோன்றிய இயக்கம்தான் ஹமாஸ். அதன் பின்னர் 2007ஆம் ஆண்டு ஆட்சியைப் பிடிக்கும் அளவிற்கு காசா பகுதியில் உள்ள பாலஸ்தீன மக்களிடம் செல்வாக்கு பெற்றது ஹமாஸ் இயக்கம். 51 கிலோ மீட்டர் நீளமும் 21 கிலோமீட்டர் அகலமும் கொண்ட சிறிய செவ்வக வடிவ காசா பகுதியில், இஸ்ரேலின் ராணுவத்தை மீறியும் அதன் உளவு அமைப்பான மொஸாட்டின் கண்களின் மண்ணை தூவியும் இயக்கத்தை செழிப்புடன் வழிநடத்த ஹமாஸ் கொண்ட திட்டம் தான் சுரங்கப்பாதை வலை அமைப்பு.
இஸ்ரேலின் கூற்றின்படி ஹமாஸ் அமைப்பினர் காசாப் பகுதியில் 60 மைல் தூரத்திற்கு சுரங்கப்பாதைகள் அமைத்துள்ளதாகக் கூறப்படுகிறது. 2007ஆம் ஆண்டு முதல் இயக்கத்தை வலுப்படுத்துவதற்காக பல்வேறு முயற்சிகளில் ஈடுபட்டு வந்த ஹமாஸ் அமைப்பினர், இஸ்ரேலின் விமானப்படைக்கு சவால் விடும் வகையில் பதுங்கு குழிகளையும் சுரங்கப்பாதை வலையமைப்புகளையும் தோண்டி அதன்மூலம் பல்வேறு காரியங்களை சாதித்துள்ளனர்.
இதையும் படிக்க: ”நான் என்ன தவறு செய்தேன்” - பாலஸ்தீனத்திற்கு ஆதரவு தெரிவித்த கர்நாடக இளைஞர் கைது!
ஆயுதக் கிடங்குகளுக்காகவும், ஆயுதங்களை பரிவர்த்தனை செய்வதற்காகவும் சுரங்கப்பாதையை ஹமாஸ் அமைப்பினர் உருவாக்கினர். 2015 ஆண்டு வாக்கில் ஹமாஸ் அமைப்பின் முக்கிய தலைவர்களுக்கு ஒரு கிலோமீட்டர் நீளம் கொண்ட சுரங்கப்பாதையாவது சொந்தமாக இருக்க வேண்டும் என்கிற அளவிற்கு பாதாள உலகத்தில் மீது ஹமாஸ் அமைப்பினருக்கு ஆசை அதிகரித்தது.
எகிப்திலிருந்து காசா வரை ரஃபா நகர் வழியாக செல்லும் சுரங்கப்பாதை ஹமாஸின் சுரங்க பாதைகளில் மிகவும் நீளமானது. பொதுவாக 40 அடி அகலத்திற்கு கான்கிரீட் சுவர்களால் அமைக்கப்பட்டிருக்கும் இந்த சுரங்கத்தை வழித்தடமாக மட்டுமின்றி வாழ்விடமாகவும் பயன்படுத்தியுள்ளனர் ஹமாஸ் அமைப்பினர்.
இதையும் படிக்க: Israel கையில் 1+ லட்சம் ராணுவ வீரர்கள்.. Hamas வெறும் 40 ஆயிரம் வீரர்கள்.. ஆனாலும்?
