பாலியல் வன்முறை வழக்கு: மஞ்சு வாரியர் அமெரிக்கா செல்ல தடை!

நடிகை பாலியல் வன்முறை வழக்கில் கைது செய்யப்பட்டுள்ளார் திலீப். இவரது முன்னாள் மனைவி மஞ்சு வாரியர் வெளிநாடு செல்ல போலீசார் தடை விதித்துள்ளனர். அமெரிக்காவின் நியூயார்க் மற்றும் சிகாகோவில் அடுத்த வாரம் நடக்கும் விருது விழாக்களில் நடிகர் திலீப்பின் முன்னாள் மனைவி மஞ்சு வாரியர் கலந்துகொள்ள இருந்தார். நடிகை பாலியல் பலாத்கார வழக்கின் விசாரணை அடுத்தக் கட்டத்தை நோக்கி சென்றுகொண்டிருப்பதால், அங்கு செல்ல வேண்டாம் என்று போலீசார் அவரிடம் தெரிவித்துள்ளதாகக் கூறப்படுகிறது. இதனால் அவர் அங்கு செல்வதை ரத்து செய்துள்ளார்.

கடந்த சில நாட்களுக்கு முன், நடிகை மஞ்சு வாரியரை ஏடிஜிபி சந்தியா விசாரணை செய்தார். அப்போது திலீப்புக்கும் தனக்குமான பிரச்னைகளை அவரிடம் கூறியிருக்கிறார். இதையடுத்து நடிகை கடத்தப்பட்ட வழக்கில் மஞ்சு வாரியரையும் சாட்சியாக்க போலீசார் திட்டமிட்டுள்ளனர். இதையடுத்தே அவரது வெளிநாட்டுப் பயணத்தை போலீசார் தடை செய்துள்ளனர் எனக் கூறப்படுகிறது. 

இதுபற்றி மஞ்சு வாரியரின் செய்தி தொடர்பாளர் கூறும்போது, ‘ அமெரிக்காவில் நடக்கும் விருது விழாவுக்கு அவர் செல்லவில்லை என்பது உண்மைதான். ஆனால் போலீஸ் இதற்கு தடை விதிக்கவில்லை’ என்றார்.