ம.பி.-யில் கால்வாய்க்குள் பேருந்து விழுந்து பயங்கர விபத்து: 32 பேர் உயிரிழப்பு

மத்தியப் பிரதேச மாநிலம் சித்தி மாவட்டத்தில் 54 பயணிகளுடன் சென்ற பேருந்து கால்வாய்க்குள் விழுந்தது. இதில் 32 பேர் உயிரிழந்ததாக முதற்கட்ட தகவல்கள் தெரிவிக்கின்றன.

பாலத்தின் மீது பேருந்து சென்றபோது ஓட்டுனரின் கட்டுப்பாட்டை இழந்ததோடு, பாலத்தின் தடுப்புக் கட்டைகளை உடைத்துக் கொண்டு கால்வாய்க்குள் விழுந்துள்ளது.

இந்த விபத்தில் பேருந்தில் பயணித்த சுமார் 32 பேர் உயிரிழந்துள்ளதாகவும், 20-க்கும் மேற்பட்டோர் காணாமல் போயுள்ளதாகவும், 7 பேர் மீட்கப்பட்டுள்ளதாகவும் உள்ளூர் செய்தி நிறுவனங்கள் தெரிவித்துள்ளன. 

சித்தியிலிருந்து சாட்னாவுக்கு அந்தப் பேருந்து சென்றுள்ளது. சம்பவ இடத்தில் மீட்பு படையினர் பணியில் இறங்கியுள்ளதாக தகவல் கிடைத்துள்ளது. 

விபத்தில் உயிரிழந்தவர்களின் குடும்பங்களுக்கு தலா 5 லட்ச ரூபாய் வழங்க உள்ளதாக அரசு தெரிவித்துள்ளது.

“இந்த சம்பவத்திற்காக நான் மிகவும் வருந்துகிறேன். போர்க்கால அடிப்படையில் மீட்பு பணிகள் முடுக்கிவிடப்பட்டுள்ளது” என மத்திய பிரதேச முதல்வர் சிவ்ராஜ் சிங் சவுகான் கூறியுள்ளார்.