ம.பி: கல்லூரி மாணவியை பாலியல் வன்கொடுமை செய்து உயிருடன் சாக்கில் கட்டி வீசிச்சென்ற கொடூரம்

மத்தியப் பிரதேசத்தில் 19 வயது கல்லூரி மாணவியை கும்பலாக பாலியல் வன்கொடுமை செய்து உயிருடன் சாக்கில் கட்டி ரயில் தண்டவாளத்தில் வீசிச்சென்ற கொடூரம் நடந்துள்ளது.

மத்தியப் பிரதேசம் மாநிலம் இந்தூரில் வசித்துவரும் 19 வயதான கல்லூரி மாணவி ஒருவரை, அவரது முன்னாள் காதலன், நந்திகிராமில் உள்ள ஒரு வீட்டிற்கு அழைத்துச் சென்றதாக தெரிகிறது. அப்போது அங்கு அந்த மாணவியை முன்னாள் காதலனும் அவரது நண்பர்களும் சேர்ந்து பாலியல் வன்கொடுமை செய்துள்ளனர்.

அதோடு விட்டுவிடாமல் அந்த மாணவியை கத்தியால் குத்தி, ஒரு சாக்கில் கட்டிப்போட்டு அருகிலுள்ள ரயில் தண்டவாளத்தில் வீசிச் சென்றுள்ளனர். அப்போது அந்த வழியாக சென்றவர்கள் மாணவியை மீட்டு போலீசாருக்கு தகவல் அளித்தனர். போலீசார் விரைந்துவந்து பலத்த காயமடைந்த மாணவியை சிகிச்சைக்காக நாக்பூர் மருத்துவக் கல்லூரி மருத்துவமனைக்கு அனுப்பி வைத்தனர். மாணவி அளித்த வாக்குமூலத்தை தொடர்ந்து, மாணவியை பாலியல் வன்கொடுமை செய்த 5 நபர்கள் மீது வழக்குப்பதிவு செய்து சிறையில் அடைத்தனர்.

மத்தியப் பிரதேசத்தில் இச்சம்பவம் நடப்பதற்கு சில தினங்களுக்கு முன்னதாக, 13 வயது சிறுமி ஒருவர், 7 பேர் கொண்ட கும்பலால் பாலியல் வன்கொடுமை செய்யப்பட்டது குறிப்பிடத்தக்கது.

சிவ்ராஜ் சிங் தலைமையிலான மத்தியப் பிரதேச அரசு பெண்களுக்கு எதிரான குற்றங்கள் குறித்து மக்களுக்கு விழிப்புணர்வு ஏற்படுத்தும் வகையில் மாநிலம் முழுவதும் 15 நாள் ‘சம்மன்’ பிரச்சாரத்தை நடத்தி வரும் நேரத்தில் இந்த பாலியல் வன்கொடுமை சம்பவங்கள் அரங்கேறியுள்ளது.