Published : 13,Jul 2017 11:39 AM
ஆப்பிரிக்க பெண்களை விமர்சித்து சர்ச்சையில் சிக்கிய பிரான்ஸ் அதிபர்
ஆப்பிரிக்காவின் மிகப்பெரிய பிரச்னையே ஒவ்வொரு பெண்களுக்கும் 7 முதல் 8 குழந்தைகள் இருப்பதுதான் என்று பிரான்ஸ் அதிபர் இம்மானுவேல் மாக்ரோன் பேசியதற்கு சமூகவலைதளங்களில் வறுத்தெடுக்கிறார்கள்.
ஜெர்மனியின் ஹேம்பர்க் நகரில் கடந்த 7,8 ஆகிய தேதிகளில் நடந்த ஜி20 மாநாட்டில் ஆப்பிரிக்கா எதிர்கொள்ளும் சவால்கள் என்ற தலைப்பில் பிரான்ஸ் அதிபர் இம்மானுவேல் மாக்ரோன் பேசினார். அந்த பேச்சு குறித்த வீடியோ பதிவுகள் தற்போது சமூக வலைதளங்களில் வெளியாகி சர்ச்சையை ஏற்படுத்தியுள்ளது. அந்த கூட்டத்தில் பேசிய அவர், பொருளாதாரரீதியாகவோ, சூழல் ரீதியாகவோ அல்லது அரசியல் ரீதியாகவோ ஆப்பிரிக்கக் கண்டம் பிரச்னையை எதிர்கொள்ளவில்லை. மாறாக பூகோளரீதியிலேயே ஆப்பிரிக்கா பிரச்னைகளை எதிர்கொண்டுள்ளது. ஒரு பெண்ணுக்கு 7 முதல் 8 குழந்தைகள் இருக்கும் போது, அங்கு செலவுகள் அதிகரிக்கும். இதனால் அரசுகளால் நிலையாக எதையும் திட்டமிட்டு நிறைவேற்ற முடியாது என்று அவர் பேசியிருந்தார்.
மாக்ரோனின் இந்த கருத்துக்கு நெட்டிசன்கள் பலரும் கண்டனக் குரல் எழுப்பியுள்ளனர். ஆப்பிரிக்கக் கண்டத்தை பெரு நிறுவனங்கள் கொள்ளையடித்ததாலேயே அங்கு பஞ்சம் நிலவுகிறது என்று குறிப்பிட்டுள்ள இணையவாசி ஒருவர், அதைவிடுத்து பெண்களை இழிவுபடுத்தும் வகையில் ஒரு நாட்டின் அதிபர் கருத்துத் தெரிவித்திருப்பதை ஏற்றுக்கொள்ள முடியாது என்று பதிவிட்டுள்ளார். ஆப்பிரிக்காவின் பிரச்னைகளுக்கு குழந்தைகளைக் குறை கூறுவதை நிறுத்துங்கள் என்று இன்னொருவர் பதிவிட்டுள்ளார்.
