விவசாயிகளுக்கு ஆதரவாக டிச.5 ஆம் தேதி போராட்டம்: திமுக அறிவிப்பு

டெல்லியில் போராடி வரும் விவசாயிகளுக்கு ஆதரவாக வரும் 5ஆம் தேதி தமிழகம் முழுவதும் திமுக போராட்டத்தில் ஈடுபட உள்ளது.

வேளாண் சட்டங்களுக்கு எதிராக டெல்லியில் 8வது நாளாக விவசாயிகள் போராட்டம் நடத்தி வருகின்றனர். ஏற்கெனவே நடைபெற்ற முதல் கட்ட பேச்சுவார்த்தையில் முடிவு எட்டப்படாததால் அந்த பேச்சுவார்த்தை தோல்வி அடைந்தது. இதையடுத்து இன்று இரண்டாம் கட்ட பேச்சுவார்த்தை நடைபெற உள்ளது.

இந்நிலையில் விவசாயிகளுக்கு ஆதரவாக வரும் 5ஆம் தேதி தமிழகம் முழுவதும் போராட்டம் நடத்தப்படும் என திமுக அறிவித்துள்ளது. காணொலியில் திமுக மாவட்ட செயலாளர்களுடன் அக்கட்சியின் தலைவர் ஸ்டாலின் நடத்திய கூட்டத்தில் போராட்டம் பற்றிய முடிவு எடுக்கப்பட்டுள்ளது. நாளை மறுநாள் மாவட்ட தலைநகரங்களில் காலை 10 மணிக்கு கருப்புக்கொடி ஏந்தி ஆர்ப்பாட்டத்தில் ஈடுபட உள்ளதாக திமுக அறிவிப்பு வெளியிட்டுள்ளது.