கன்னியாகுமரி அருகே சிறுமிகள் கடத்தல்; 2 பேர் போக்சோவில் கைது!

கன்னியாகுமரி அருகே 17 வயது சிறுமி மற்றும் அவரது தங்கையை கடத்திய இரண்டு வாலிபர்கள் போக்சோவில் கைது செய்யப்பட்டனர்.

கன்னியாகுமரி மாவட்டம் மணவாளக்குறிச்சி அருகே வெள்ளமோடி கிராமத்தை சேர்ந்த தொழிலாளியின் மனைவி உடல் நலக்குறைவால் பாதிக்கப்பட்டார். இதையடுத்து பாளையங்கோட்டை அரசு மருத்துவமனையில் கடந்த ஜூலை மாதம் சிகிச்சைக்காக சேர்க்கப்பட்டார். அங்கு ஒரு மாதம் சிகிச்சை பெற்று வந்தார். அவரது 17 வயது மகள் மருத்துவமனையில் தங்கி தாயை கவனித்து வந்தார். அவர் மருத்துவமனைக்கு செல்வதற்காக நாகர்கோவில் அருகே கட்டையன்விளையை சேர்ந்த ஆட்டோ டிரைவர் ஜெயசுதன் என்பவரது ஆட்டோவை வாடகைக்கு பிடித்துள்ளனர்.

அப்போது 17 வயது சிறுமியுடன் ஜெயசுதனுக்கு பழக்கம் ஏற்பட்டது. இந்த நிலையில் ஜூலை 20ஆம் தேதி சிறுமி திடீரென மாயமானார். இதுகுறித்து குளச்சல் மகளிர் போலீசில் புகார் செய்யப்பட்டது. சிறுமியை ஆட்டோ டிரைவர் ஜெயசுதன் கடத்திச் சென்று விட்டதாக மகளிர் போலீசார் வழக்குப்பதிவு செய்து விசாரித்து வந்தனர். தொடர்ந்து ஜெயசுதனை பல்வேறு இடங்களிலும் போலீசார் தேடிவந்தனர். இதற்கிடையில் மருத்துவமனையில் சிகிச்சை பெற்றுவந்த சிறுமியின் தாய் சிகிச்சை பலனின்றி பரிதாபமாக இறந்தார்.

இந்த சம்பவம் நடந்த ஓரிரு நாளிலேயே சிறுமியின் தங்கையை, வெள்ளமோடியை சேர்ந்த சித்தப்பா முறை உறவினரான தொழிலாளி அருண் என்ற ஐயப்பன் கடத்தி சென்று விட்டதாக குளச்சல் மகளிர் போலீசில் புகார் செய்யப்பட்டது. அதன்படி மகளிர் போலீசார் 2 வாலிபர்கள் மீதும் போக்சோ பிரிவில் வழக்குப்பதிவு செய்தனர். தொடர்ந்து இரண்டு பேரையும் மகளிர் இன்ஸ்பெக்டர் வின்சென்ட் அன்பரசி தேடி வந்தார்.

இந்நிலையில் தலைமறைவான இரண்டு பேரையும் போலீசார் நேற்று முன்தினம் கைது செய்தனர். பின்னர் அவர்களை நாகர்கோவில் மகிளா கோர்ட்டில் ஆஜர்படுத்தினர். போக்சோவில் கைது செய்யப்பட்ட ஆட்டோ டிரைவர் ஜெயசுதனுக்கு திருமணமாகி இரண்டு பிள்ளைகள் உள்ளது குறிப்பிடத்தக்கது. தொடர்ந்து போலீசார் விசாரித்து வருகின்றனர்.