மீண்டும் தொடங்கிய பேருந்து சேவை..: பீகார் அரசு அதிரடி அறிவிப்பு!

பீகார் மாநிலத்தில் 5 மாதங்களுக்கு பிறகு இன்று முதல் பொதுப் போக்குவரத்து இயங்கத் தொடங்கியது.

கொரோனா வைரஸ் பரவல் தடுப்பு நடவடிக்கையாக நாடு முழுவதும் கடந்த மார்ச் மாதம் முதல் பொதுமுடக்கம் அமலில் உள்ளது. இதனால், கடந்த 5 மாதங்களாக பொதுப்போக்குவரத்து முடங்கியுள்ளது.

ஊரடங்கில் பல்வேறு தளர்வுகளை அறிவித்து வந்த மத்திய அரசு, சமீபத்தில், இ-பாஸ் நடைமுறையை கைவிடும்படி மாநில அரசுகளுக்கு உத்தரவிட்டது.

பீகார் மாநிலத்தில், அரசு பொதுத்துறை நிறுவனங்கள் மற்றும் தனியார் அலுவலகங்கள் 50 சதவித பணியாளர்களுடன் இயங்கலாம் என்று மாநில அரசு அறிவித்த நிலையில், இன்று முதல் பொதுப் போக்குவரத்து இயங்குவதற்கு அனுமதி வழங்கியுள்ளது.  

இதைத்தொடர்ந்து, பீகார் மாநிலத்தில், இன்று முதல் மாவட்டங்களுக்கு இடையேயான பேருந்து சேவை மீண்டும் தொடங்கி உள்ளது. கொரோனா பரவல் தடுப்பு வழிகாட்டு நெறிமுறைகளுக்கு உட்பட்டே போக்குவரத்து இயக்கப்படும் என மாநில அரசு தெரிவித்துள்ளது. இதனால் பொதுமக்கள் முகக்கவசம் அணிந்து பயணம் செய்து வருகின்றனர்.