ஜல்லிக்கட்டு போராட்டத்திற்கு ஆதரவு: தி.மு.க. ஆர்ப்பாட்டம் ஒத்திவைப்பு

ஜல்லிக்கட்டுப் போராட்டம் நடைபெற்று வருவதால், திமுக சார்பில் மத்திய பாஜக அரசின் நீட் தேர்வை எதிர்த்து நடைபெறுவதாக அறிவிக்கப்பட்டிருந்த ஆர்ப்பாட்டம் ஒத்தி வைக்கப்பட்டுள்ளது.

மத்திய பா.ஜ.க. அரசின் “நீட்” நுழைவுத் தேர்வு மற்றும் “புதிய கல்விக் கொள்கை”யை கண்டித்து தமிழகமெங்கும் மாவட்ட தலைநகரங்களில் திமுக சார்பில் 20ம் தேதி கண்டன ஆர்பாட்டம் நடத்தப்படுவதாக அறிவிக்கப்பட்டிருந்தது.

இந்நிலையில் திமுக சார்பில் வெளியிடப்பட்டுள்ள அறிக்கையில், “ஜல்லிக்கட்டு” நடத்தக் கோரி மாணவர்கள், இளைஞர்கள் தமிழகம் முழுவதிலும் உணர்ச்சி மிகு போராட்டங்களை நடத்தி வருகின்றனர். போராடும் மாணவர்களுக்கு திமுக செயல் தலைவர் மு.க.ஸ்டாலின் ஆதரவு தெரிவித்துள்ளார் என தெரிவிக்கப்பட்டுள்ளது.

ஆகவே, பீறிட்டு வெளிவரும் தமிழுணர்வை போற்றி, மாணவர்கள் மற்றும் இளைஞர்களின் ஜனநாயக ரீதியிலான வரலாறு காணாத போராட்டத்திற்கு மதிப்பளிக்கும் வகையில் திராவிட முன்னேற்றக் கழகத்தின் சார்பில் 20ம் தேதி நடைபெறுவதாக இருந்த கண்டன ஆர்ப்பாட்டம் தற்போது ஒத்தி வைக்கப்படுகிறது எனவும் போராட்டத்திற்கான மறு தேதி பின்னர் அறிவிக்கப்படும் என்றும் அந்த அறிக்கையில் தெரிவிக்கப்பட்டுள்ளது.