மாதவரம் பால் பண்ணை ஊழியர்களுக்கு கொரோனா - ஆவின் பால் விநியோகம் பாதிக்கப்படும் அபாயம்?

சென்னை மாதவரம் ஆவின் பால் பண்ணை ஊழியர் இருவருக்கு கொரோனா தொற்று உறுதியானதை அடுத்து அங்கு பால் பாக்கெட்டுகளை ஏற்றும் பணிகள் பாதிக்கப்பட்டுள்ளன.

மாதவரம் ஆவின் பால் பண்ணையில் இருந்து சென்னைக்கு நாள் ஒன்றுக்கு 2 லட்சத்து 38 ஆயிரம் பால் பாக்கெட்டுகள் விநியோகம் செய்யப்படுகின்றன. இங்கு 100-க்கும் மேற்பட்ட ஒப்பந்த தொழிலாளர்கள் பால் பாக்கெட்டுகளை ஏற்றும் பணி செய்து வருகின்றனர். இந்த நிலையில், அங்கு புரியும் ஊழியருக்கு கொரோனா தொற்று கண்டறியப்பட்டுள்ளது. இதனையடுத்து, பால் பாக்கெட்டுகளை ஏற்றும் பணிக்காக வந்த ஊழியர்கள், கொரோனா பாதிப்பு குறித்து தகவல் தெரிந்ததால், திரும்பிச் சென்றதாக கூறப்படுகிறது.

நாள் ஒன்றுக்கு 34 லாரிகளில் பால் பாக்கெட்டுகள் ஏற்றி செல்லப்படும் நிலையில், ஊழியர்கள் குறைவாக வந்ததால், காலையில் செல்ல வேண்டிய லாரிகளில் 14 மட்டுமே வெளியில் சென்றதாக தகவல்கள் தெரிவிக்கின்றன. இந்நிலையில் அதிகாரிகள் கேட்டுக் கொண்டதற்கு இணங்க சில தொழிலாளர்கள் பணிக்கு திரும்பி விட்டதாகவும், பால் தட்டுப்பாடு ஏற்படாத வகையில் நடவடிக்கைகள் எடுக்கப்பட்டுள்ளதாகவும் நிர்வாகம் தரப்பில் தெரிவிக்கப்பட்டுள்ளது. மேலும் சேலம், காஞ்சிபுரம், விழுப்புரம், வேலூர் மாவட்டங்களில் இருந்து பால் கொண்டு வர ஏற்பாடு செய்யப்பட்டுள்ளது.