ராமநாதபுரத்தில் போலீசாருக்கு பயந்து கடலில் தூக்கி வீசப்பட்ட 14 கிலோ தங்கம்!

ராமநாதபுரம் அருகே மன்னார் வளைகுடா கடலில் தூக்கி வீசப்பட்ட சுமார் 6 கோடி ரூபாய் மதிப்புள்ள 14 கிலோ தங்கத்தை கடலோர காவல் படை அதிகாரிகள் பறிமுதல் செய்துள்ளனர்.

இலங்கையில் இருந்து கடல் வழியாக கடத்திவரப்படும் தங்கம் உள்ளிட்ட பொருட்களை மன்னார் வளைகுடா தீவு மணலில் புதைத்து வைக்கும் புதுயுக்தியை சமீப காலமாக கடத்தல்காரர்கள் பின்பற்றி வருகின்றனர். இதனிடையே இலங்கையில் இருந்து கடத்தி வரப்பட்ட தங்கக் கட்டிகள் ராமநாதபுரம் மாவட்டம் மண்டபம் அருகே மன்னார் வளைகுடாவில் இருந்து கடத்தப்படுவதாக மத்திய வருவாய் புலனாய்வு துறை அதிகாரிகளுக்கு கடந்த 3 ஆம் தேதி தகவல் கிடைத்தது.

அவர்கள் நடத்திய விசாரணையில், கடலோர காவல் படையின் ரோந்து கண்காணிப்பில் இருந்து தப்பித்துக் கொள்வதற்காக இலங்கையில் இருந்து தங்கத்தை கடத்தி வந்த  கும்பல் மன்னார் வளைகுடா கடலில் அதனை வீசிவிட்டு, அங்கு ஜிபிஎஸ் அடையாளத்தை வைத்துவிட்டு சென்றது தெரியவந்தது.

மேலும், கடலோர காவல் படையின் கெடுபிடி குறைந்ததும் ஜிபிஎஸ் அடையாளம் மூலம் தங்கத்தை ராமநாதபுரம் வழியாக சென்னைக்கு கொண்டு சென்று விற்க திட்டமிட்டதும் தெரியவந்தது. இதைத்தொடர்ந்து மன்னார் வளைகுடா பகுதியில் கடலோர காவல் படையினர் ரோந்து பணியை தீவிரப்படுத்தியதில், சந்தேகத்திற்கிடமான வகையில் ஒரு படகு நடுக்கடலில் நின்றிருந்தது. அந்த படகில் இருந்த இருவரை பிடித்து விசாரித்ததில், அவர்கள் மண்டபம் பகுதியை சேர்ந்த ஆஷிக், பாரூக் என தெரியவந்தது.

மேலும், இலங்கையில் இருந்து கடத்தி வந்த தங்கத்தை முயல் தீவு அருகே நடுக்கடலில் வீசிவிட்டதாக கூறினர். இதைத்தொடர்ந்து நீச்சல் வீரர்களை வரவழைத்து கடலோர காவல்படையினர் அந்த இடத்தில் சோதனையிட்டதில் 5 கோடியே 80 லட்சம் ரூபாய் மதிப்புள்ள 14 கிலோ தங்கக்கட்டிகள் சிக்கின.

வறுமையால் தற்கொலைக்கு முயன்ற மாணவர் - சொந்த பணத்தை கொடுத்து உதவிய ஆய்வாளர்..!