'கொஞ்சம் ஜில் பண்ணு மாப்பி’ : வெளியானது மாஸ்டர் படத்தின் ‘ஒருகுட்டிகதை’ பாடல்.

லோகேஷ் கனகராஜ் இயக்கத்தில் விஜய் நடிக்கும் மாஸ்டர் படத்தின் ‘ஒருகுட்டிகதை’ பாடல் வெளியாகியுள்ளது.

லோகேஷ் கனகராஜ் இயக்கத்தில் விஜய் நடித்து வரும் திரைப்படம் மாஸ்டர். இந்தப் படத்தில் விஜய் சேதுபதி, மாளவிகா மோகனன் உள்ளிட்டோர் நடித்துள்ளனர். இந்தப் படத்திற்கான படப்பிடிப்பு விறுவிறுப்பாக நடைபெற்று வருகிறது. சமீபத்தில் நெய்வேலி என்.எல்.சி பகுதியில் படப்பிடிப்பு நடைபெற்று வந்தது அனைவருக்கும் தெரிந்ததே.

இந்நிலையில், மாஸ்டர் படத்தின் முதல் பாடல் இன்று வெளியாகியுள்ளது. ஏற்கனவே படத்தின் சில போஸ்டர்கள் வெளியாகி நல்ல வரவேற்பை பெற்றிருந்த நிலையில், படத்தின் முதல் பாடல் இன்று மாலை 5 மணிக்கு வெளியானது. இந்தப் படத்திற்கு அனிருத் இசையமைத்திருக்கிறார்.

தற்போது வெளியாகியுள்ள ‘குட்டிக் கதை’ பாடலை நடிகர் விஜய் பாடியுள்ளார். பாடலை எழுதியிருக்கிறார் அருண்ராஜா காமராஜ். 'Let me sing a kutti story pay attention listen to me' என துவங்கும் இப்பாடல் மாணவர்களுக்கு அறிவுரை கூறும் விதமாக உள்ளது. பாடல் முழுக்க ஆங்கில வார்த்தைகளைக் கொண்டு எழுதப்பட்டுள்ளது.

பாடல் வெளியாகியிருக்கும் வீடியோவின் அனிமேஷன் காட்சிகள் மிகவும் அற்புதமாக உருவாக்கப்பட்டுள்ளது. முழுக்க முழுக்க விஜயின் குரலில் நேர்மறை சிந்தனைகளைச் சொல்லும் படியாக இப்பாடல் அமைந்திருக்கிறது. life is very short nanba, always be happy போன்ற வரிகள் நிச்சயம் அவரது ரசிகர்களால் இன்று முதலே முணுமுணுக்கப்படும்.