அப்படியே அலேக்காக தூக்கிச் செல்லப்படும் 15ம் நூற்றாண்டு மசூதி

துருக்கியில் 15 ஆம் நூற்றாண்டில் கட்டப்பட்ட மசூதி ஒன்று பாதுகாப்பு காரணத்திற்காக வேறு ஒரு‌ இடத்திற்கு வாகனம் மூலம் நகர்த்தப்பட்டது.

கட்டிடக்கலையின் வளர்ச்சி என்பது உலக அளவில் மற்ற துறையைவிட மிகவேகமாக வளர்ந்துவிட்டது. ஒரு கட்டிடத்தை நாம் எங்கு நினைக்கிறோமோ அங்கு அப்படியே தள்ளி வைக்ககூடிய அளவுக்கு தொழில்நுட்பங்கள் கண்டுபிடிக்கப்பட்டுவிட்டன.அப்படி ஒரு ஆச்சரியத்தை நேரடியாக பார்க்கும் போது பெரிய வியப்பு துருக்கியில் நடந்துள்ளது.

துருக்கியிலுள்ள ‌திக்ரிஸ் நதியின் குறுக்கே கட்டப்பட்ட லிசு என்ற அணை முழுக்க தண்ணீர் நிரம்பியது. இதனால் அணையைச் சுற்றியுள்ள பகுதிகள் நீரில் மூழ்கும் நிலை ஏற்பட்டுள்ளது. இதனால் அப்பகுதியில் வெள்ள அபாய எச்சரிக்கை விடப்பட்டுள்‌ளது. வெள்ளத்தில் சிக்கி 6 நூற்றாண்டு பழமை வாய்ந்த மசூதி பாதிக்கப்பட்டுவிடக்கூடாது என்பதற்காகவும் முன்னெச்சரிக்கை நடவடிக்கையாகவும், அப்பகுதியிலிருந்த எரி ரிஸ்க் மசூதி ‌பெயர்த்து எடுக்கப்பட்டு‌ கலாச்சார பூங்காவில் வைக்கப்படவுள்ளது.

ஆயிரத்து 700 டன் எடையுள்ள பழமையான மசூதி Self Propelled Moduler Transporter என்ற தொழில்நுட்பம் மூலம்‌ ‌‌பெயர்த்து எடுக்கப்பட்டு சுமார் 4 கிலோ மீட்டர் தொலைவில் இருக்கும் இடத்திற்கு வாகனத்தில் கொண்டு செல்லப்பட்டது.