வெங்காயம் திருடியவருக்கு அடி உதை

புதுச்சேரி பெரிய மார்க்கெட் பகுதியில் இரவு நேரத்தில் வெங்காயம் திருடியவரை வியாபாரிகள் அடித்து உதைத்த‌னர்.

நாடு முழுவதும் கடுமையான மழைப் பொழிவால் வெங்காயத்தின் விளைச்சல் பாதிக்கப்பட்டுள்ளது. இதனால் தமிழகத்தில் ஒரு கிலோ வெங்காயத்தின் விலை 200 ரூபாய்க்கு மேல் விற்பனை ஆகி வருகிறது. இந்நிலையில் இம்மாத இறுதிக்குள் துருக்கி, எகிப்து உள்ளிட்ட நாடுகளில் இருந்து இந்தியாவிற்கு 17 ஆயிரம் டன் வெங்காயம் இறக்குமதி செய்யப்படும் என்று மத்திய அரசு உறுதியளித்துள்ளது. 

இதனியைடே புதுச்சேரியில் பிரசித்தி பெற்ற குபேர் மார்க்கெட்டில் மொத்த வியாபாரம் மற்றும் சில்லறை வியாபாரம் ‌‌நடைபெறுகிறது. வேல்முருகன் என்பவருக்கு சொந்தமான கடையில் வைக்கப்பட்டிருந்த பூண்டு, வெங்காயம், மிளகாய் மூட்டை போன்றவை திருடு போயின. இதனை கண்காணித்த வியாபாரிகள் சந்தேகத்திற்கு இடமான வகையில் வெங்காயம் உள்ளிட்ட மூட்டைகளை இருசக்கர வாகனத்தில் வைத்து எடுத்துச்சென்ற நபரைப் பிடித்து விசாரித்தபோது, அவர் வெங்காய மூட்டையை திருடியது தெரியவந்தது. அவரைக் கட்டி ‌வைத்து உதைத்த வியாபாரிகள், எச்சரித்து அனுப்பி வைத்தனர்.

இதற்கு முன்பு மத்தியப் பிரதேசத்தில் 30 ஆயிரம் ரூபாய் மதிப்புள்ள வெங்காயத்தை மர்ம நபர்கள் அறுவடை செய்து எடுத்துச் சென்று விட்டதாக விவசாயி ஒருவர் புகார் அளித்திருந்தார். அதேபோல் தமிழகத்திலுள்ள கூத்தனூரில் 50 ஆயிரம் மதிப்பிலான வெங்காயம் திருடு போன சம்பவம் ஒன்று அப்பகுதி விவசாயிகளிடையே பெரும் அச்சத்தை ஏற்படுத்தி இருந்தது குறிப்பிடத்தக்கது.