[X] Close

கடைசி டெஸ்ட்: இரட்டை சதம் விளாசினார் ரோகித் சர்மா

Rohit-sharma-slams-Double-Century

தென்னாப்பிரிக்காவுக்கு எதிரான மூன்றாவது டெஸ்ட் போட்டியின், முதல் இன்னிங்சில் ரோகித் சர்மா இரட்டை சதம் விளாசி அசத்தினார்.


Advertisement

இந்தியா- தென்னாப்பிரிக்க அணிகளுக்கு இடையேயான மூன்றாவது டெஸ்ட் போட்டி  ராஞ்சியில் நடந்து வருகிறது. நேற்று தொடங்கிய இந்த போட்டியில், மயங்க் அகர்வால், புஜாரா, கோலி என அடுத்தடுத்து 3 விக்கெட்டுகளை இழந்து இந்திய அணி தடுமாறியது. பின்னர் தொடக்க ஆட்டக்காரர் ரோகித் சர்மாவுடன் துணை கேப்டன் ரஹானே இணைந்தார். இருவரும் சரிவில் இருந்து, இந்திய அணியை மீட்டனர். சிறப்பாக ஆடிய ரோகித், அபாரமாக சதம் அடித்தார். இது அவரது 6-வது டெஸ்ட் சதம். நடப்பு தொடரில் அவர் அடித்த 3-வது சதம். இவர்களின் சிறப்பான ஆட்டத்தால் இந்திய அணி மேலும் விக்கெட்டுகளை இழக்காமல், முதல் நாள் ஆட்டத்தை நிறைவு செய்தது. ஆட்ட நேர முடிவில் இந்திய அணி 3 விக்கெட்டுக்கு 224 ரன்கள் எடுத்திருந்தது. ரோகித் 117 ரன்களுடனும், ரஹானே 83 ரன்களுடனும் களத்தில் இருந்தனர்.


Advertisement

இரண்டாம் நாள் ஆட்டம் இன்று தொடர்ந்தது. சிறப்பாக ஆடிய ரஹானே சதம் அடித்தார். 2016-ஆம் ஆண்டுக்குப் பிறகு இந்திய மண்ணில் அவர் அடித்த சதம் இது. டெஸ்ட் போட்டிகளில் இது அவரது 11வது சதம்.

மறுமுனையில் ரோகித் சர்மா 150 ரன்களை கடந்தார். அடுத்து அதிரடி ஆட்டத்தில் ஈடுபட்ட ரஹானே, 115 ரன்களில் ஆட்டமிழக்க, ஜடேஜா, ரோகித் சர்மாவுடன் இணைந்தார். ரோகித்தும் ரஹானேவும் இணைந்து 4 வது விக்கெட்டுக்கு 267 ரன்கள் சேர்த்தனர். 

தொடர்ந்து சிறப்பாக ஆடிய ரோகித் சர்மா, இரட்டை சதம் அடிக்க இருந்தார். டிரெஸ்சிங் ரூமில் இந்திய வீரர்கள் அவருக்கு வாழ்த்துத் தெரிவிக்க, எழுந்து நின்றனர். ஆனால், அதற்குள் உணவு இடைவேளை விடப்பட்டது. அப்போது ரோகித் சர்மா 199 ரன்கள் சேர்த்திருந்தார். 


Advertisement


பின்னர் ஆட்டம் தொடங்கியதும் நிகிடி வீசிய பந்தை சிக்சருக்கு தூக்கி, ரோகித் இரட்டை சதம் விளாசினார். ஒருநாள் கிரிக்கெட் போட்டிகளில் மூன்று இரட்டை சதம் அடித்து உள்ளார் ரோகித். தற்போது டெஸ்ட் போட்டியில் தனது முதல் இரட்டை சதத்தை பதிவு செய்தார்.

இரட்டை சதம் விளாசிய அடுத்த ஓவரிலேயே,  ரபாடா பந்தில் சிக்சர் அடிக்கும் முயற்சியில் நிகிடியிடம் கேட்ச் கொடுத்து ஆட்டமிழந்தார். அவர் 212 ரன்கள் எடுத்திருந்தார். இதில் 28 பவுண்டரியும் 6 சிக்சர்களும் அடங்கும்.

இரட்டை சதம் விளாசிய ரோகித்துக்கு ரசிகர்கள் சமூக வலைத்தளங்களில் வாழ்த்துக்களைத் தெரிவித்து வருகின்றனர். 

 


Advertisement

Advertisement
[X] Close