’நம்ப முடியாத மறுபிரவேசம்’: ஸ்மித்தை புகழும் சச்சின்!

ஆஷஸ் டெஸ்ட்டில் இரட்டை சதம் விளாசிய ஆஸ்திரேலிய வீரர் ஸ்மித்தை, சச்சின் டெண்டுல்கர் பாராட்டியுள்ளார்.

இங்கிலாந்து மற்றும் ஆஸ்திரேலியா இடையேயான ஆஷஸ் டெஸ்ட் தொடரின் 4 வது போட்டி, இங்கிலாந்தில் நடந்து வருகிறது. ஆஸ்திரேலியா அணி முதலில் பேட்டிங் செய்து வருகிறது. 2ஆவது டெஸ்ட் போட்டியில் ஆர்ச்சரின் பவுன்சர் பந்தால் தாக்கப்பட்ட ஸ்மித், ஓய்விற்கு பின் இந்தப்போட்டியில் களமிறங்கினார். இதில் தனது 26ஆவது சதத்தை கடந்த அவர், குறைவான இன்னிங்ஸில் 26 சதங்களை அடித்த வீரர்கள் பட்டியலில், 2வது இடம் பிடித்துள்ளார்.இந்தப்பட்டியலில் 2-வது இடத்திலிருந்த சச்சின் டெண்டுல்கரின் சாதனையை, ஸ்மித் முறியடித்துள்ளார். சச்சின் 136 இன்னிங்ஸில் 26 சதங்களை எட்டியிருந்தார். ஆனால் ஸ்டீவ் ஸ்மித் 121 இன்னிங்ஸில் 26ஆவது சதத்தை தொட்டது குறிப்பிடத்தக்கது. தொடர்ந்து சிறப்பாக ஆடிய ஸ்மித், தனது மூன்றாவது இரட்டை சதத்தையும் பதிவு செய்தார். 

இந்நிலையில், சச்சின் டெண்டுல்கர் ஸ்மித்தை புகழ்ந்துள்ளார். தனது ட்விட்டரில், ‘சிக்கலான தொழில்நுட்பம் ஆனால் ஒழுங்கான மனநிலை, இதுதான் எல்லாவற்றையும் தாண்டி ஸ்மித்தை வேறுபடுத்திக் காண்பிக்கிறது. நம்பமுடியாத மறுபிரவேசம்’ என தெரிவித்துள்ளார்.