Published : 01,Sep 2019 01:58 PM
சந்திரயான்-2 சுற்றுவட்டப்பாதை கடைசி முறையாக மாற்றியமைப்பு
சந்திரயான்-2 விண்கலத்தின் சுற்றுவட்டப்பாதை கடைசிமுறையாக மாற்றியமைக்கப்பட்டுள்ளது.
சந்திரயான்-2 விண்கலம் நிலவை மிகவும் நெருங்கி விட்ட நிலையில் அதன் சுற்றுவட்டப்பாதை 5-வது மற்றும் இறுதி முறையாக இன்று
மாற்றியமைக்கப்பட்டுள்ளது. இதற்கு முன் கடந்த 30-ஆம் தேதி சந்திரயானின், நிலவைச் சுற்றும் இடைவெளி 124 கிலோ மீட்டராக குறைக்கப்பட்டது. வருகிற 7-ஆம் தேதி சந்திரயான் நிலவில் தரையிறங்க திட்டமிடப்பட்டுள்ள நிலையில், இன்று சந்திரயான்-2 விண்கலத்தின் சுற்றுவட்டப்பாதை கடைசிமுறையாக மாற்றியமைக்கப்பட்டது.
இதன்மூலம், நிலவில் இருந்து 100 கிலோ மீட்டர் அருகாமையில் சந்திரயான் சுற்றி வரும். நாளை ஆர்பிட்டரில் இருந்து லேண்டர் தனியாகப் பிரிந்து நிலவின் 30 கிலோ மீட்டர் தொலைவுக்கு நுழையும். அதன்பிறகு, நிலவில் 7-ஆம் தேதி தரையிறங்குவதற்கான பல்வேறு படிநிலைகளை லேண்டர் மேற்கொள்ளும் என இஸ்ரோ தெரிவித்துள்ளது.
