சர்ச்சையாகும் ரோகித் விக்கெட் : அவுட்டா ? இல்லையா ?

இந்தியாவின் தொடக்க பேட்ஸ்மேன் ரோகித் ஷர்மா இன்று ஆட்டமிழந்தது சர்ச்சையை ஏற்படுத்தி வருகிறது.

உலகக் கோப்பை தொடரின் 34வது லீக் போட்டி இந்தியா மற்றும் வெஸ்ட் இண்டீஸ் அணிகள் இடையே நடைபெற்று வருகிறது. இந்தப் போட்டியில் டாஸ் வென்ற இந்திய அணி முதலில் பேட்டிங்கை தேர்வு செய்தது. பேட்டிங்கை தொடங்கிய இந்திய அணி தொடக்க ஆட்டக்காரர் ரோகித் ஷர்மா 18 (23) ரன்களில் விக்கெட்டை இழந்தார். 

ஆனால் முதலில் அவர் அவுட் இல்லை என்று மெயின் அம்பயர் கூறிவிட்டார். ஏனென்றால் பந்து பேட்டில் படாமல் சென்றதுபோல இருந்தது. 

அதன்பின்னர் வெஸ்ட் இண்டீஸ் அணி ரிவிவ் (மறுபார்வை) ஆப்ஷனை பயன்படுத்தினர். அதை பார்த்த பின்னர் ரோகித் ஷர்மா அவுட் என மூன்றாவது அம்பயர் அறிவித்தார். இருப்பினும் அந்தப் பந்து உண்மையில் ரோகித் ஷர்மாவின் பேட்டில் பட்டதா ? என்ற கேள்வியை ரசிகர்கள் தற்போது எழுப்பி வருகின்றனர். 

ஏனென்றால் அந்தப் பந்து பேட்டில் படாமல், ரோகித் ஷர்மா காலில் கட்டியிருந்த பேடில் பட்டு சென்றது போல இருக்கிறது. அந்தப் புகைப்படத்தை சமூக வலைத்தளங்களில் பகிர்ந்து வரும் ரசிகர்கள், மூன்றாவது அம்பயரை விமர்சித்து வருகின்றனர்.