குழந்தைகளை விற்ற விவகாரம் : செவிலியர் மற்றும் கணவர் அதிரடி கைது

நாமக்கல்லில் பச்சிளம் குழந்தைகளை விற்பனை செய்த புகாரில் ஓய்வுபெற்ற செவிலியர் அமுதா மற்றும் அவரது கணவர் அதிரடியாக கைது செய்யப்பட்டனர்.

நாமக்கல் மாவட்டம் அவிநாசியில் உள்ள ராசிபுரத்தைச் சேர்ந்த செவிலியர் அமுதா குழந்தைகளை விற்பனை செய்து வருவது தொடர்பான ஆடியோ வெளியானது. இதுதொடர்பான புகாரில் மாவட்ட காவல்கண்காணிப்பாளர் அருளரசு, ராசிபுரம் துணை காவல் கண்காணிப்பாளர் விஜயராகவன், ராசிபுரம் காவல் ஆய்வாளர் செல்லமுத்து உள்ளிட்ட காவல்துறை அதிகாரிகள் அமுதாவிடம் சுமார் 11 மணி நேரம் விசாரணை நடத்தினர். 

அப்போது சேலத்தில் இருந்து ஒரு குழந்தையையும், கொல்லிமலையில் இருந்து 2 குழந்தைகளையும் விலைக்கு வாங்கி விற்பனை செய்ததாக அமுதா வாக்குமூலம் அளித்தார் என்று காவல்துறை தரப்பில் தகவல் தெரிவிக்கப்படுகிறது. அதில், ஒரு குழந்தையை ஓசூர் பகுதியில் தம்பதியருக்கு விற்பனை செய்ததாகவும் கூறப்படுகிறது. தொடர் விசாரணையையடுத்து செவிலியர் அமுதாவை காவல்துறையினர் கைது செய்தனர். 

மேலும், குழந்தையை கடத்த உதவியாக இருந்ததாக அவரது கணவர் ரவிச்சந்திரனும் கைது செய்யப்பட்டார். முன்னதாக, அமுதாவிடம் விசாரணை நடத்துமாறு, நாமக்கல் மாவட்ட ஆட்சியர் ஆசியா மரியமுக்கு, சுகாதாரத்துறைச் செயலர் பீலா ராஜேஷ் உத்தரவிட்டிருந்தார்.