பெண்ணிடம் தவறாக நடந்து கொண்ட ஊழியர்.. இழப்பீடாக 200 ரூபாய் கூப்பன் வழங்கிய ஸ்விகி..!

பாலியல் ரீதியாக தவறாக நடந்துகொண்டதாக ஸ்விகி ஊழியர் மீது பெண் ஒருவர் புகார் கூறிய நிலையில், அப்பெண்ணுக்கு 200 ரூபாய் மதிப்புள்ள கூப்பனை ஸ்விகி நிறுவனம் வழங்கிய சம்பவம் அதிர்ச்சியை ஏற்படுத்தியுள்ளது.

பெங்களூருவை சேர்ந்தவர் நேகா (பெயர் மாற்றப்பட்டுள்ளது). இவர் கடந்த வியாழக்கிழமை ஸ்விகி ஆப் வழியாக உணவு ஆர்டர் செய்துள்ளார். அதனை வீட்டிற்கு கொடுக்க வந்த ஸ்விகி ஊழியர், நேகாவிடம் பாலியல் ரீதியாக தவறாக நடக்க முயற்சித்துள்ளார். இதனால் அவர் கொடுத்த உணவை சாப்பிடவே நேகாவிற்கு வெறுப்பாக இருந்துள்ளது. இதனையடுத்து வாடிக்கையாளர்கள் சேவை மையத்திற்கு தொடர்பு கொண்ட நேகா, சம்பந்த்தப்பட்ட அந்த ஊழியர் மீது நடவடிக்கை எடுக்குமாறும் வலியுறுத்தியிருந்தார்.

ஆனால் இவ்விவகாரத்தில் மென்போக்கை கையாண்ட ஸ்விகி நிறுவனம், சாரி கூறியதோடு, அப்பெண்ணுக்கு 200 ரூபாய் மதிப்புள்ள கூப்பனை இழப்பீடாக அளித்துள்ளது. இதனால் அப்பெண் மேலும் அதிர்ச்சியடைந்துள்ளார். இதனையடுத்து தனக்கு நடந்த அத்துமீறல் குறித்து நேகா தனது ஃபேஸ்புக் பக்கத்தில் பதிவிட்டிருந்தார். இந்நிலையில் இவ்விவகாரத்தில் உரிய நடவடிக்கை எடுக்கப்படும் என ஸ்விகி நிறுவனம் தெரிவித்துள்ளது.