எம்.ஜி.ஆர் விஜயன் கொலை வழக்கு: ஐகோர்ட் பரபரப்பு தீர்ப்பு

எம்.ஜி.ஆரின் வளர்ப்பு மகள் சுதாவின் கணவர் விஜயன் கொல்லப்பட்ட வழக்கில் இரண்டு பேரை வழக்கில் இருந்து விடுவித்து சென்னை உயர்நீதிமன்றம் உத்தரவிட்டுள்ளது.

எம்.ஜி.ஆரின் வளர்ப்பு மகள் சுதா. இவர் கணவர் விஜயன் என்ற எம்.ஜி.ஆர். விஜயன். கடந்த 2008ம் ஆண்டு கோட்டூர்புரத்தில் இவர் இரும்பு கம்பியால் அடித்து கொலை செய்யப்பட்டார். இந்த வழக்கை அபிராமபுரம் போலீசார் விசாரித்தனர். பின்னர் இந்த வழக்கு சி.பி.சி.ஐ.டி. விசாரணைக்கு மாற்றப்பட்டது. விசாரணையில் சொத்து பிரச்சினையில் விஜயனின் மனைவி சுதாவின் தங்கை பானு, கூலிப்படை மூலம் விஜயனை கொலை செய்தது தெரியவந்தது. கருணா என்ற போலீஸ்காரர் பானுவுக்கு உதவி செய்யும் விதமாக, இந்த கூலிப்படையை ஏற்பாடு செய்ததும் தெரிய வந்தது. இந்த கொலை வழக்கை விசாரித்த சென்னை மாவட்ட முதன்மை செசன்சு நீதிமன்றம் அனைவருக்கும் ஆயுள் தண்டனை விதித்து கடந்த ஆண்டு தீர்ப்பளித்தது.

இந்த தண்டனையை ரத்து செய்யக்கோரி சென்னை உயர்நீதிமன்றத்தில் மேல் முறையீடு செய்யப்பட்டது. இந்த மேல் முறையீட்டில் இன்று காலை தீர்ப்பு வழங்கப்பட்டது. இதில் பானு மற்றும் கார்த்தி ஆகியோரை விடுதலை செய்த நீதிமன்றம், மற்றவர்களின் ஆயுள் தண்டனையை உறுதி செய்தது.