“கோடநாடு விசாரணைக்கு சிறப்பு புலனாய்வுக் குழு” - ஸ்டாலின் வலியுறுத்தல்

கோடநாடு கொலை, கொள்ளை குறித்து சிறப்பு புலனாய்வு குழு அமைத்து விசாரணை நடத்த வேண்டும் என திமுக தலைவர் ஸ்டாலின் வலியுறுத்தியுள்ளார்.

கோடநாடு கொள்ளை மற்றும் கொலை விவகாரத்தில் நடவடிக்கை எடுக்க வலியுறுத்தி ‌திமுக சார்பில் சைதாப்பேட்டை நீதிமன்றம் அருகே போராட்டம் நடைபெற்றது. இதில் அக்கட்சியின் சட்டமன்ற உறுப்பினர்கள், நிர்வாகிகள், தொண்ட‌ர்கள் பங்கேற்றனர். சைதாப்பேட்டை நீதிமன்றம் அருகில் இருந்து பேரணியாக சென்று ராஜ்பவனை முற்றுகையிட திட்டமிடப்பட்டது. 

இதையடுத்து போராட்டத்தில் ஈடுபட்ட திமுக சட்டமன்ற உறுப்பினர்கள் உள்ளிட்ட ஏராளமானோர் கைது செய்யப்பட்டு, கிண்டி ரேஸ்கோர்சுக்கு கொண்டு செல்லப்பட்டனர். அவர்களை திமுக தலைவர் மு.க.ஸ்டாலின் நேரில் சென்று சந்தித்தார். அப்போது பேசிய ஸ்டாலின் கோடநாடு கொலை, கொள்ளை குறித்து விசாரணை நடத்த வேண்டும் என வலியுறுத்தினார்.

முன்னதாக, கோடநாடு விவகாரம் தொடர்பாக தெஹல்கா ஊடகத்தின் முன்னாள் ஆசிரியர் மேத்யூ சாமுவேல்ஸ் வெளியிட்டு வீடியோ ஒன்று பெரும் சர்ச்சை ஏற்படுத்தியது. இதற்கு முதலமைச்சர் பழனிசாமி தரப்பில் மறுப்பு தெரிவிக்கப்பட்டதுடன், வழக்கும் தொடரப்பட்டது. இதுதொடர்பாக கோடநாடு கொள்ளை விவகாரத்தில் வழக்கு பதியப்பட்டுள்ள சயான் மற்றும் மனோஜ் ஆகியோர் கைது செய்யப்பட்டு, பின்னர் ஜாமீனில் விடுவிக்கப்பட்டனர்.