தமிழகத்தின் வானிலை நிலவரம் : வானிலை ஆய்வு மையம் எச்சரிக்கை

தமிழகத்தில் உருவாகியுள்ள காற்றழுத்தத் தாழ்வு நிலை தீவிரமடைய வாய்ப்பு உள்ளது என இந்திய வானிலை ஆய்வு மையம் தெரிவித்துள்ளது.

தென்கிழக்கு வங்கக் கடல் மற்றும் இந்தியப் பெருங்கடல் பகுதியில் நிலவும் காற்றழுத்தத் தாழ்வு நிலை தீவிரமடைய வாய்ப்புள்ளதாக இந்திய வானிலை ஆய்வு மையம் தெரிவித்துள்ளது. காற்றழுத்தத் தாழ்வு பகுதியானது அடுத்த 48 மணி நேரத்தில் மாறி தொடர்ந்து தீவிரமடைய வாய்ப்புள்ளதாகத் தெரிவிக்கப்பட்டுள்ளது. 

மேலும்  தமிழகத்தில் அடுத்த சில தினங்களுக்கு வறண்ட வானிலையே நிலவும் என்றும் ஒருசில பகுதிகளில் மழை பெய்ய வாய்ப்புள்ளதாகவும் தெரிவிக்கப்பட்டுள்ளது. தென்கிழக்கு வங்கக்கடல் மற்றும் இந்திய பெருங்கடல் பகுதிக்கு மீனவர்கள் செல்ல வேண்டாம் எனவும் இந்திய வானிலை ஆய்வு மையம் எச்சரிக்கை விடுத்துள்ளது.

இதனிடையே வடகிழக்கு பருவமழை இந்த ஆண்டு இதுவரை போதிய அளவில் பெய்யவில்லை. சென்னையிலும் இதுவரை வழக்கமான அளவை விட குறைவான அளவிலேயே மழை பெய்துள்ளது. இதனால் அடுத்த ஆண்டு சென்னைக்கு தண்ணீர் தட்டுப்பாடு ஏற்பட்டு விடுமோ என்று சென்னை வாசிகள் கலக்கம் அடைந்துள்ளனர்.