இன்று அர்ஜெண்டினா செல்கிறார் பிரதமர் மோடி.. டிரம்பை சந்திக்கவும் திட்டம்

ஜி20 நாடுகள் மாநாட்டில் கலந்து கொள்வதற்காக பிரதமர் மோடி இன்று அர்ஜெண்டினா பயணம் மேற்கொள்கிறார். இப்பயணத்தின்போது அமெரிக்க அதிபர் டிரம்ப் உள்ளிட்ட தலைவர்களை பிரதமர் மோடி சந்தித்து பேசுகிறார்.

ஜி 20 நாடுகளின் உச்சி மாநாடு நவம்பர் 28-ஆம் தேதி அர்ஜெண்டினாவில் தொடங்குகிறது. ஆண்டு தோறும் நடைபெறும் இந்த மாநாட்டில் உலக அளவில் பொருளாதாரத்தில் முன்னேற்றத்துடன் காணப்படும் 20 நாட்டு தலைவர்கள்   பங்கேற்பார்கள். இம்மாநாட்டில் பங்கேற்க பிரதமர் மோடி இன்று அர்ஜெண்டினா செல்கிறார்.

ஜி20 மாநாட்டையொட்டி அமெரிக்க அதிபர் டெனால்ட் டிரம்ப், பிரதமர் மோடி, ஜப்பான் பிரதமர் ஷின்ஜோ அபே ஆகியோர் முத்தரப்பு பேச்சுவார்த்தையில் ஈடுபடுவார்கள் எனத் தெரிகிறது. ஆனால் என்ன விவகாரம் குறித்து பேசப் போகிறார்கள் என்ற தகவல்கள் இதுவரை தெரியவில்லை.

இதுதவிரவும் டொனால்ட் டிரம்ப், அர்ஜெண்டினா, சீனா, ஜெர்மனி உள்ளிட்ட நாடுகளின் தலைவர்களுடன் ஆலோசனை நடத்த உள்ளார். ஜி20 மாநாட்டில் வர்த்தகம், சூழலியல் மாற்றம், சுகாதாரம் உள்பட பல்வேறு அம்சங்கள் குறித்து முக்கிய விவாதங்கள் நடைபெற உள்ளதாக கூறப்படுகிறது.