“இந்தியாவை அடைய ஆசைப்பட்டால் இருமடங்கு பதிலடி விழும்” - பிரதமர் மோடி காட்டம்

இந்திய மண்ணை அடைய ஆசைப்படுபவர்களுக்கு இரு மடங்கு வலிமையுடன் பதிலடி தருவோம் என பிரதமர் மோடி சூளுரைத்துள்ளார்.

நேதாஜி சுபாஷ் சந்திரபோஸ் ஆசாத் ஹிந்த் அமைத்ததன் 75வது ஆண்டை நினைவு கூறும் விதமாக டெல்லியில் சிறப்பு நிகழ்ச்சி நடைபெற்றது. அப்போது டெல்லி செங்கோட்டையில் பிரதமர் மோடி கொடி ஏற்றி வைத்தார். சுதந்திர தினம் அல்லாத ஒரு நாளில் பிரதமர் ஒருவர் செங்கோட்டையில் கொடியேற்றுவது இதுவே முதல்முறை. 

இந்நிகழ்ச்சியில் பேசிய பிரதமர், இந்தியா எந்த நாட்டு மண்ணுக்கும் ஆசைப்படவில்லை என்றும், அதுதான் நமது பாரம்பரியம் என்றும் குறிப்பிட்டார். இந்திய ராணுவத்தை பலப்படுத்த நவீன ரக ஆயுதங்கள் வாங்கப்பட்டு வருவதாக அவர் தெரிவித்தார். நேதாஜி சுபாஷ் சந்திர போஸின் கனவுகளை நனவாக்க தமது அரசு உறுதிபூண்டுள்ளதாகவும் மோடி குறிப்பிட்டார். 

இந்நிகழ்வின்போது நேதாஜி உருவாக்கிய இந்திய தேசிய ராணுவத்தினர் பயன்படுத்திய தொப்பி பிரதமருக்கு பரிசாக வழங்கப்பட்டது. நேதாஜியின் நெருங்கிய நண்பர் ஒருவர் அத்தொப்பியை பிரதமருக்கு வழங்கினார். அந்த தொப்பியை அணிந்தவாறு பிரதமர் தேசியக் கொடியை ஏற்றியது குறிப்பிடத்தக்கது.