தீவிரமாகும் மீ டு விவகாரம்: நடிகர் சங்கம் மீண்டும் உறுதி!

பாலியல் புகார்களை கண்காணிக்க குழு ஒன்றை விரைவில் அமைக்க இருப்பதாக தென்னிந்திய நடிகர் சங்கம் மீண்டும் தெரிவித்துள்ளது.

 நாடு முழுவதும் தங்களுக்கு இழைக்கப்பட்ட பாலியல் ரீதியான பிரச்னைகளை பெண்கள் ’மீ டூ’ என்ற ஹேஷ்டேக் மூலம் இணையத்தில் வெளிப்படுத்தி வருகின்றனர். இது பரபரப்பை ஏற்படுத்தி வருகிறது. தினமும் பல புகார்கள் வெளிவந்து அதிர்ச்சி அளித்து வருகிறது.

(கங்கனா)

நடிகை, தனுஸ்ரீ தத்தா, நானா படேகர் மீது புகார் கூறினார். இதைத் தொடர்ந்து கங்கனா ரனவத், குயின் இயக்குனர் மீது பாலியல் புகார் சொல்ல, இது தொடர்பான புகார்கள் வெளிவந்த வண்ணம் உள்ளன. இந்நிலையில் தமிழகத்தில் பாடலாசிரியர் வைரமுத்து மீது பாடகி சின்மயி புகார் தெரிவித்தார். அவரைத் தொடர்ந்து மேலும் சிலரும் அவர் மீது புகார் கூறினர்.

(சின்மயி)

ஆவணப்பட இயக்குனர் லீலா மணிமேகலை, இயக்குனர் சுசீந்திரன் மீது குற்றஞ்சாட்டினார். இதற்கு மறுப்புத் தெரிவித்த அவர், லீனா மீது வழக்குத் தொடுத்துள்ளார். இந்நிலையில், தமிழில், ‘நெருங்கி வா முத்தமிடாதே’, ’நிலா’, ’நிபுணன்’ படங்களில் நடித்துள்ள நடிகை ஸ்ருதி ஹரிஹரன், அர்ஜுன் மீது அத்துமீறி நடந்து கொண்டதாக மீ டூவில் கூறியுள்ளார். இதற்கு அர்ஜூன் மறுப்புத் தெரிவித்துள்ளார்.

(ஸ்ருதி ஹரிஹரன்)

இதற்கிடையே, தென்னிந்திய நடிகர் சங்கம் இன்று வெளியிட்டுள்ள அறிக்கையில், ’திரைப்படம் மற்றும் நாடகம் உருவாகின்ற படப்பிடிப்பு தளங்களில் பாலின வேறுபாடின்றி கலைஞர்களுக்கு மன அழுத்தமோ, அச்சுறுத்தலோ இன்றி சுதந்திரமாக, சுயமரியாதையாக தங்கள் கலை யை செயல்படுத்தும் சூழலைத் தக்க வைத்துக்கொள்ளவும் பாதுகாக்கவும் தென்னிந்திய நடிகர் சங்கம் தீவிரமாய் கவனம் மேற்கொள்ளும். அவ்வகையில் அதைச் செயல்படுத்தி கண்காணிக்கக் குழு ஒன்றையும் அமைக்கும்’ என்று தெரிவித்துள்ளது.