பாலியல் புகார்களை விசாரிக்க கர்நாடக சினிமாவில் தனிக் குழு!

இந்தியாவில் #MeToo பெரும் பரபரப்பை ஏற்படுத்தி வருகிறது. நடிகை தனுஸ்ரீ தத்தா, நானா படேகர் மீது பாலியல் புகார் கூறியதைத் தொடர்ந்து மற்ற நடிகர்களும் தங்களுக்கு நேர்ந்த பாலியல் தொல்லைகளை இந்த ஹேஷ்டேக்கில் பகிர்ந்து வருகின்றனர். நடிகை கங்கனா ரனவத், குயின் இயக்குனர் மீதும் நடிகை புளோரா தயாரிப்பாளர் மீதும் புகார்களை கூறினர். இந்திய பட இயக்குனர் சஜித் கான் மீதும் புகார்கள் கூறப்பட்டன. இதையடுத்து ஹவுஸ்புல் 4 படத்தில் இருந்து நானா படேகர், இயக்குனர் சஜித் கான் விலகினர். தமிழ் சினிமாவில் பாடகி சின்மயி, பாடலாசிரியர் வைரமுத்து மீது பரபரப்பு புகாரை கூறியுள்ளார்.

இந்நிலையில், #MeToo புகார் தொடர்பாக விசாரிக்க 4 ஓய்வுபெற்ற நீதிபதிகள் குழு அமைக்கப் படும் என மத்திய அமைச்சர் மேனகா காந்தி தெரிவித்துள்ளார்.

’தமிழ்த்திரைத்துறையில் இப்புகார்களை விசாரிக்க, 3 பேர் கொண்ட குழு அமைக்கப்படும்’ என்று நடிகர் விஷால் நேற்று தெரிவித்திருந்தார். 

இந்நிலையில், கன்னட சினிமாவில் உரிமை மற்றும் சமத்துவத்துக்காக ஏற்படுத்தப்பட்டுள்ள அமைப்பில் பாலியல் தொல் லைக் குறித்து விசாரிக்க குழு ஒன்று ஏற்படுத்தப்பட்டுள்ளது. இதில் நடிகர் சேதன் குமார், நடிகைகள் பிரியங்கா உபேந்திரா, ஸ்ருதி ஹரிஹரன், இயக்குனர் கவிதா லங்கேஷ் ஆகியோர் இதில் இடம்பெற்றுள்ளனர். 30-க்கும் மேற்பட்ட நடிகர்கள் இதற்கு ஆதரவு தெரிவித்து கர்நாடக பிலிம் சேம்பர் தலைவர் சின்னி கவுடாவிடம் மனு கொடுத்தனர்.

இதுபற்றி சேதன் குமார் கூறும்போது, ‘பாலியல் தொல்லைகள் குறித்தும் பட வாய்ப்புக்காக படுக்கையை பகிரும் சம்பவங்கள் தொடர்பான புகார்கள் பற்றியும் நீதிமன்றத்துக்கு செல்லும் முன் இந்தக் குழு முதலில் விசாரிக்கும்’ என்றார். இந்தக் குழு பாலி யல் விஷயங்களை மட்டுமல்லாமல், நடிகைகளின் சம்பள பிரச்னை உள்ளிட்ட புகார்கள் குறித்தும் விசாரிக்கும் என்று கூறப் பட்டுள்ளது.

‘இந்தக் குழுவை எப்படி அடுத்தக்கட்டத்துக்கு கொண்டு செல்வது என்பது பற்றி வரும் 26ஆம் தேதி பேசி முடிவெடுப்போம்’ என்றார் கர்நாடக பிலிம்சேம்பர் தலைவர் சின்னி கவுடா.