சைக்கிளில் சென்ற நடிகை சஞ்சனாவின் செல்போன் வழிப்பறி

சினிமா நடிகை சஞ்சனா சிங்கின் விலை உயர்ந்த செல்போன் சென்னை அண்ணாநகர் பகுதியில் வழிப்பறி செய்யப்பட்டது.

ரேணிகுண்டா, மீகாமன், அஞ்சான், தனியொருவன் உட்பட சில திரைப்படங்களில் நடித்தவர் சஞ்சனா சிங். சென்னை முகப்பேரில் வசிக்கும் இவர் வழக்கம்போல் காலையில் சைக்கிள் மிதித்து உடற்பயிற்சி செய்வதற்காக அண்ணாநகர் பகுதியில் சென்றுள்ளார். கையில் விலை உயர்ந்த செல்போனை வைத்திருந்தார்.

அப்போது இருசக்கர வாகனத்தில் வந்த இரண்டு பேர், கண் இமைக்கும் நேரத்தில் அவரது செல்போனை பறித்துக் கொண்டுச் சென்றனர். இதனால் அதிர்ச்சி அடைந்த சஞ்சனா அவர்களை சைக்கிளில் விரட்டிச் சென்றார். அவர்கள் பறந்துவிட்டனர்.
செல்போனில் பல்வேறு பிரபலங்களின் எண்கள், முக்கிய தகவல்கள் உள்ளிட்டவை இருப்பதால் நடிகை சஞ்சனா கவலையடைந்துள்ளார். இதுகுறித்து அண்ணாநகர் போலீசில் அவர் புகார் தெரிவித்தார். போலீசார் விசாரணை நடத்தி வருகின்றனர்.