நீதிமன்றத்தில் உள்ள விவகாரங்கள் குறித்து பேச அனுமதி மறுத்ததற்கெல்லாம் வெளிநடப்பு செய்யக் கூடாது என திமுகவினரை துணை முதலமைச்சர் ஓ.பன்னீர் செல்வம் கேட்டுக் கொண்டுள்ளார்.

பேரவையில் எஸ்.வி.சேகரை கைது செய்யாதது ஏன் என கேள்வி எழுப்பிய எதிர்க்கட்சித் தலைவர் மு.க.ஸ்டாலின் அதற்கு அரசு விளக்கம் அளிக்க வேண்டும் எனக் கேட்டுக் கொண்டார். ஆனால் இது நீதிமன்ற விவகாரம் என்பதால், அவையில் இது குறித்து பேச முடியாது என சபாநாயகர் தனபால் அனுமதி வழங்க மறுத்தார். இதைத் தொடர்ந்து திமுகவினர் பேரவையில் இருந்து வெளிநடப்பு செய்தனர். 

இந்நிலையில் இந்த விவகாரம் குறித்து பேசிய துணை முதலமைச்சர் ஓ.பன்னீர்செல்வம், 2006 முதல் 2011 ஆம் ஆண்டு வரை திமுக ஆட்சிக் காலத்தில் பல்வேறு விவகாரங்கள் குறித்து அவையில் பிரச்னை எழுப்ப முயற்சித்தபோது, அப்போது துணை முதல்வராக இருந்த ஸ்டாலின், நீதிமன்றத்தில் உள்ள விவகாரம் எனக் கூறி பேச அனுமதி மறுத்தார் என கூறினார். எனவே இந்தக் காரணத்துக்கெல்லாம் வெளிநடப்பு செய்வதை திமுகவினர் தவிர்க்க வேண்டும் என்றும் அவர் கேட்டுக் கொண்டார்.