5 வயது சிறுமியை பாலியல் வன்கொடுமை செய்து கொன்ற பக்கத்து வீட்டுக்காரர்

ஜார்க்கண்ட் மாநிலம் தன்பாத்தில் 5 வயது சிறுமி பாலியல் வன்கொடுமை செய்து கொலை செய்யப்பட்ட சம்பவம் மக்களை அதிர்ச்சிக்கு உள்ளாக்கியுள்ளது. வன்கொடுமை செய்த நபரை கைது செய்து காவல்துறையினர் விசாரித்து வருகின்றனர். 

தன்பத் பகுதியை சேர்ந்த சிறுமி மனிஷாவை (பெயர் மாற்றப்பட்டுள்ளது) , அவரது பெற்றோர்கள் தங்கள் மகனின் நண்பனோடு அருகே நடந்த திருமணம் ஒன்றுக்கு அனுப்பி வைத்துள்ளனர். தங்களது வாகனத்தில் இடமில்லாததால், தெரிந்தவர்தானே என்ற நம்பிக்கையில் சிறுமி அந்த நபரோடு அனுப்ப அவரது அம்மாவும் சம்மதம் தெரிவித்தார். 21 வயதான அந்த நபர் மனிஷாவை கூட்டிச்சென்று விட்டு , வீடு திரும்பிய போது மனிஷா அவரோடு வரவில்லை. 

மனிஷா எங்கே என பெற்றோர் கேள்வி எழுப்பியும் அந்த நபரிடம் இருந்து சரியான பதில் வரவில்லை. பதறிப்போன பெற்றோர் உடனடியாக காவல்துறைக்கு தகவல் தெரிவித்தனர். விசாரணை மேற்கொண்ட காவல்துறையினர் சிறுமியின் வீட்டின் இருந்து சில கிலோ மீட்டர் தூரத்தில் அவளது உடலை  கண்டெடுத்தனர். இதனை அடுத்து சிறுமியை கூட்டிச் சென்ற நபர் மீது வழக்குப்பதிவு செய்யப்பட்டது. 

காவல்துறை நடத்திய விசாரணையில் சிறுமியை கட்டாயப்படுத்தி பாலியல் வன்கொடுமை செய்ததை அந்த நபர் ஒத்துக் கொண்டார். திருமணத்திற்கு கூட்டிச் சென்று விட்டு திரும்பும் சமயம் இரவாக இருந்ததால் யாருக்கும் தெரியாது என்று எண்ணி சிறுமியை வன்கொடுமை செய்ததாகவும், சிறுமி இறந்து விட்டதால் பிளாஸ்டிக் பையில் சுற்றி சாலை ஓரத்தில் உள்ள புதரில் வீசியதாகவும் தெரிவித்தான். தொடர்ந்து விசாரணை நடைபெற்று வருகிறது.