“ஆட்சியைக் கவிழ்க்கும் எண்ணம் ஒருபோதும் நடக்காது” எடப்பாடி பழனிசாமி  

காவிரி ‌விவகாரத்தில் தமிழக உரிமையை கர்நாடகாவிற்கு தாரை வார்த்தவர் திமுக தலைவர் கருணாநிதி என முதலமைச்சர் எடப்பாடி பழனிசாமி குற்றம்சாட்டியுள்ளார். 

காவிரி மேலாண்மை வாரியம் அமைக்க மத்திய அரசை வலியுறுத்தி திருவாரூரில் அதிமுக சார்பில் நடைபெற்ற பொதுக்கூட்டத்தில் பேசிய முதலமைச்சர் எடப்பாடி பழனிசாமி, திமுக ஆட்சி அதிகாரத்தில் இருந்த போது காவிரி விவகாரத்தில் துரும்பைக் கூட கிள்ளிப் போடவில்லை என்று கூறினார். மேலும் ஐக்கிய முற்போக்கு கூட்டணி அரசில் செல்வாக்குடன் இருந்த போது மேலாண்மை வாரியத்திற்காக திமுக ஏன் நடவடிக்கை எடுக்கவில்லை எனவும் முதலமைச்சர் வினவினார். முதலமைச்சர் என்ற மாண்பிற்கு கூட மரியாதை தெரியாதவர் மு.க.ஸ்டாலின் என்று விமர்சித்த பழனிசாமி, மேலும், சட்டமன்றத்தை கேலிக்கூத்தாக்கியவர்கள் திமுக எம்.எல்.ஏக்கள் என்றும், காவிரி மேலாண்மை வாரியம் அமைக்க வலியுறுத்தி மத்திய அரசுக்கு தமிழக அரசு அழுத்தம் கொடுத்து வருவதாகவும் தெரிவித்தார். தமது தலைமையிலான ஆட்சியைக் கவிழ்க்கலாம் என சிலர் எண்ணுவதாகவும், அது ஒருபோதும் நடக்காது எனவும் முதலமைச்சர் எடப்பாடி பழனிசாமி தெரிவித்தார்.