Published : 17,Apr 2018 10:31 AM

அநீதி, அநியாயம் பிரதமருக்கு ஸ்டாலின் கடிதம் 

stalin-Letter-to-Prime-minister-modi

காவிரி விவகாரம் தொடர்பாக அனைத்துக் கட்சித் தலைவர்களை சந்திக்க அனுமதி கோரி திமுக செயல் தலைவரும், எதிர்க்கட்சித் தலைவருமான மு.க.ஸ்டாலின், பிரதமர் நரேந்திர மோடிக்கு கடிதம் எழுதியுள்ளார்.

காவிரி விவகாரம் தொடர்பாக பிரதமர் நரேந்திர மோடிக்கு, ஸ்டாலின் எழுதியுள்ள கடிதத்தில், மாநில அரசு, தமிழ்நாட்டின் உணர்வுகளை மத்திய அரசுக்கு முறைப்படி தெரிவித்து, அழுத்தம் கொடுத்து காவிரி உரிமைகளை பாதுகாக்கும் என்ற நம்பிக்கையை தமிழக மக்கள் இழந்துவிட்டனர் என்பதால், அந்த உணர்வுகளை தங்களிடம் நேரடியாக தெரிவிப்பதற்காக அனைத்துக் கட்சித் தலைவர்களுடன் சந்திக்க‌ நேரம் கேட்டுள்ளேன் என ஸ்டாலின் கூறியுள்ளார். காவிரி விவகாரத்தில் உச்சநீதிமன்றம் பிறப்பித்த உத்தரவை செயல்படுத்த மேலும் 3 மாதங்கள் அவகாசம் வேண்டும் என மத்திய அரசு தாக்கல் செய்த 'விளக்க மனு' அநீதியானது என்றும், அநியாயமானது என்றும் ஸ்டாலின் குறிப்பிட்டுள்ளார். காவிரி‌ நதிநீர் பிரச்னையில் பிரதமர் நரேந்திர மோடி நேரடியாகத் தலையிட வேண்டும் எனக் கூறியுள்ள ஸ்டாலின், 3 கோரிக்கைகளையும் கடிதத்தில் வலியுறுத்தியுள்ளார். 

உச்சநீதிமன்றத்தில் தாக்கல் செய்துள்ள 'விளக்கம் கேட்கும்' மனுவை திரும்பப் பெறுமாறு மத்திய நீர்வளத்துறை அமைச்சகத்திற்கு உத்தரவிட வேண்டும் என கடிதத்தில் கூறியுள்ளார். மே 3ஆம் தேதி நடைபெறவுள்ள வழக்கு விசாரணைக்காகவோ, கர்நாடக தேர்தலுக்காகவோ காத்திருக்காமல், கடந்த பிப்ரவரி 16ஆம் தேதி உச்சநீதிமன்றம் அளித்த தீர்ப்பின்படி, உடனடியாக காவிரி மேலாண்மை வாரியத்தை அமைக்க உத்தரவிடுமாறு பிரதமரை கேட்டுக்கொண்டுள்ளார். மேலும் உச்சநீதிமன்ற தீர்ப்புக்கு எதிராகவும், அவமதிக்கும் வகையிலும் பேசிய மத்திய நீர்வளத்துறை அமைச்சரையும், நீர்வளத்துறை செயலாளரையும் பிரதமர் நரேந்திர மோடி கண்டிக்க வேண்டும் என மு.க.ஸ்டாலின் வலியுறுத்தியுள்ளார்.

சற்று முன்



எடிட்டர் சாய்ஸ்