மாணவிகளை பேராசிரியரே தவறாக வழிநடத்துவதா ?- ஸ்டாலின் கண்டனம்

கல்லூரி மாணவிகளை ஒரு பேராசிரியையே தவறான பாதையில் அழைத்துச் செல்ல முயற்சித்திருப்பது அதிர்ச்சியளிப்பதோடு, கடும் கண்டனத்திற்குரியது என்று திமுக செயல் தலைவர் மு.க. ஸ்டாலின் தெரிவித்துள்ளார்.

விருதுநகர் மாவட்டம் அருப்புக்கோட்டையில் உள்ள தனியார் கல்லூரியில் கணிதப் பிரிவு பேராசிரியராக பணிபுரிந்தவர் நிர்மலா தேவி. இவர் கல்லூரி மாணவிகளிடம் பேசிய தொலைப்பேசி உரையாடல் சமூக வலைத்தளங்களில் வேகமாக பரவியது. இந்த விவகாரம் சர்ச்சையை ஏற்படுத்த, மாணவிகளை தவறாக வழிநடத்தியதாகக் கூறப்படும் பேராசிரியை பணியிடைநீக்கம் செய்யப்பட்டார். அவ‌ர் மீது காவல்நிலையத்தில் கல்லூரி நிர்வாகம் புகார் அளித்திருந்தது. அத்துடன் அவரை கைது செய்யக்கோரி மாணவர்களும், பெற்றோர்களும், மகளிர் அமைப்பினரும் கல்லூரி முன் கூடி முழக்கமிட்டனர்.

இதையடுத்து நிர்மலா தேவி மீது அளிக்கப்பட்டுள்ள புகாரின் அடிப்படையில் காவல்துறையினர் வழக்குப்பதிவு செய்தனர். இதனையடுத்து இன்று மாலை அவர் காவல் துறையால் கைது செய்யபட்டார். கைது செய்யப்பட்ட அவர் மீது உயர்மட்ட விசாரணை நடத்தக்கோரி ஆளுநர் பன்வாரிலால் புரோஹித் உத்தரவிட்டுள்ளார். அந்த விசாரணையை ஓய்வுபெற்ற ஐஏஎஸ் அதிகாரி ஆர்.சந்தானம் நடத்துவார் என்றும் ஆளுநர் அறிவித்துள்ளார். குற்றத்தில் சம்பந்தப்பட்டவர்கள் யாரும் தண்டனையிலிருந்து தப்பிக்க முடியாது என்றும் பன்வாரிலால் தெரிவித்துள்ளார்.

இந்த நிலையில் பேராசிரியரின் தவறான நடவடிக்கை குறித்து ட்விட்டரில் பதிவிட்டுள்ள மு.க. ஸ்டாலின் ‘ அவர் எந்த 'மேலிடத்திற்காக' இந்த ஈனச் செயலில் ஈடுபட்டார் என்பதைக் கண்டறிந்து குற்றவாளிகளை கூண்டிலேற்ற வேண்டும் என்று வலியுறுத்தியுள்ளார். கல்வியை போதிக்க வேண்டிய பேராசிரியர் ஒருவரே கல்லூரி மாணவிகளின் வாழ்க்கையை நாசமாக்க முயன்ற இந்த பிரச்னையில் வழக்கு விசாரணையை உயர் நீதிமன்ற மேற்பார்வையில், சிபிஐயிடம் ஒப்படைக்க வேண்டும் எனவும் ஸ்டாலின் வலியுறுத்தியுள்ளார்.