தோனிதான் என் கேப்டன்....புகழும் விராட் கோலி

கேப்டன் பொறுப்பில் இருந்து தோனி விலகினாலும், அவர் தான் என்றும் தமது கேப்டன் என விராட் கோலி கூறியுள்ளார்.

இந்திய ஒருநாள், மற்றும் டி20 கிரிக்கெட் போட்டியின் கேப்டன் பொறுப்பில் இருந்து விலகுவதாக மகேந்திரசிங் தோனி கடந்த 4-ம் தேதி அறிவித்தார். இவர் தலைமையிலான இந்திய அணி இதுவரை 199 ஒருநாள் போட்டிகளில் விளையாடியுள்ளது. இதில் 110 போட்டியில் வெற்றியும், 74 போட்டிகளில் தோல்வியும் கண்டுள்ளது. அதேபோல் 72 டி20 போட்டிகளில் இவரது தலைமையின் கீழ் இந்திய அணி 41 போட்டிகளில் வென்று 28-ல் தோற்றுள்ளது.

இந்த நிலையில் இங்கிலாந்து அணிக்கு எதிரான ஒருநாள், டி20 கிரிக்கெட் போட்டியில் விளையாடும் இந்திய அணி இன்று அறிவிக்கப்பட்டுள்ளது. இதில் அணியின் கேப்டனாக விராட் கோலி அறிவிக்கப்பட்டுள்ளார். முன்னதாக தோனியின் முடிவு குறித்து தமது டுவிட்டர் பக்கத்தில் கருத்து தெரிவித்துள்ள விராட் கோலி ‘இளம் வீரர்கள் விரும்பும் கேப்டனாக மகேந்திர சிங் தோனி திகழ்ந்தார்’ என புகழாரம் சூட்டியுள்ளார். அத்துடன், ‘தேசத்தில் பெண்களுக்கு சமமாக உரிமை வழங்கப்பட வேண்டும். அவர்களை வேறுபடுத்திப் பார்க்க வேண்டாம் என பெண்கள் குறித்த கருத்து ஒன்றையும் கோலி பதிவிட்டுள்ளார்.