சில திரைப்பட வசனங்கள் கண்ணியமாக இல்லை: வெங்கையா நாயுடு வேதனை

சில திரைப்படங்களில் வரும் வசனங்கள் கண்ணியமாக இல்லை என்று குடியரசுத் துணைத் தலைவர் வெங்கையா நாயுடு கூறினார்.

விஜயவாடாவில் நடந்த 29-வது புத்தகக் கண்காட்சியைத் தொடங்கி வைத்து நேற்று அவர் பேசும்போது இவ்வாறு தெரிவித்தார்.

அவர் மேலும் பேசும்போது, ‘ஒரு புத்தகத்தைத் திறந்தால் அது ஓர் உலகத்தை உங்களுக்கு காட்டுகிறது. புத்தகம் நல்ல நண்பன், அதோடு நல்ல ஆசிரியனும் கூட. நமது வாழ்க்கைத் தரத்தை உயர்த்தவும் சரியான பாதையில் வழிநடத்தவும் புத்தகங்கள் உதவுகின்றன. இந்திய பாரம்பரியம் புத்தகங்கள் மற்றும் நூலாசிரியர்களுக்கு அதிக முக்கியத்துவம் தருகின்றன. ஆனால், எத்தனை பதிப்பகங்கள் நமது நாட்டின், வரலாறு, கலாச்சாரம் மற்றும் பாரம்பரியம் பற்றிய அறிவை வழங்குகின்றன. எத்தனை பதிப்பகங்கள், சமூக விழிப்புணர்வை மக்களுக்கு வழங்குகின்றன. எத்தனை பதிப்பகங்கள் சமூகத்தை தவறாக வழிநடத்துகின்றன என்பது பற்றிய விவாதங்கள் வேண்டும்.

அதோடு திரைப்படங்களும் இந்திய கலாசாரம், மொழி, பண்பாட்டைப் பாதுகாக்க வேண்டும். சில திரைப்படங்களில் வரும் வசனங்கள் கண்ணியமாக இல்லை. சினிமா சக்தி வாய்ந்த மீடியம். அது சமூகத்தின் கண்ணாடியாகவும் வாழ்வை மேம்படுத்துவதாகவும் இருக்க வேண்டும்’ என்றார்.