நியூசிலாந்து டெஸ்ட்: பரிதாபமாக தோற்றது வெஸ்ட் இண்டீஸ்

வெஸ்ட் இண்டீஸ் அணிக்கு எதிரான முதல் டெஸ்ட் போட்டியில் நியூசிலாந்து அணி வெற்றி பெற்றது.

வெஸ்ட் இண்டீஸ் கிரிக்கெட் அணி நியூசிலாந்தில் சுற்றுப்பயணம் செய்து விளையாடி வருகிறது. இந்த அணிகளுக்கு இடையேயான முதல் டெஸ்ட் போட்டி, வெலிங்டனில் நடந்தது. முதலில் பேட் செய்த வெஸ்ட் இண்டீஸ் 134 ரன்னில் சுருண்டது. பின்னர் தனது முதல் இன்னிங்சை ஆடிய நியூசிலாந்து 520 ரன்கள் குவித்து டிக்ளர் செய்தது.

இரண்டாவது இன்னிங்ஸை விளையாடிய வெஸ்ட் இண்டீஸ் அணி, மூன்றாம் நாள் முடிவில் 2 விக்கெட் இழப்புக்கு 214 ரன்கள் எடுத்திருந்தது. பிராத்வெயிட் 79 ரன்களுடனும், ஷாய் ஹோப் 21 ரன்களுடனும் ஆட்டமிழக்காமல் இருந்தனர். நான்காம் நாள் ஆட்டம் இன்று தொடங்கியது. ஹோப் 37 ரன்னில் ஆட்டமிழந்தார். அடுத்த வந்தவர்களும் நியூசிலாந்தின் நேர்த்தியான பந்துவீச்சில் விக்கெட்டுகளை இழந்தனர். இதையடுத்து அந்த அணி 319 ரன்களுக்கு ஆல் அவுட் ஆனது. நியூசிலாந்து அணி வெற்றி பெற்றது.

நியூசிலாந்து தரப்பில் ஹென்றி 3 விக்கெட்டுகளை வீழ்த்தினார். போல்ட், கிராண்ட் ஹோம், வாக்னர் தலா இரண்டு விக்கெட்டுகளை எடுத்தனர்.