Published : 20,Nov 2017 07:57 AM

சதத்தை நோக்கி கோலி: இந்திய அணி விக்கெட்டுகள் சரிவு!

India-lead-by-196-runs-with-3-wickets-remaining

இந்தியா - இலங்கை அணிகள் இடையிலான முதல் டெஸ்ட் கிரிக்கெட் போட்டியில் இந்திய அணியின் கேப்டன் விராத் கோலி சதத்தை நோக்கி விளையாடி வருகிறார்.

கொல்கத்தா ஈடன் கார்டன் மைதானத்தில் நடைபெற்று வரும் இப்போட்டியில் 4வது நாளான நேற்று இந்திய அணி, தனது 2வது இன்னிங்சில் ஒரு விக்கெட் இழப்புக்கு 171 ரன் எடுத்திருந்தது. தொடக்க வீரர் லோகேஷ் ராகுல் 73 ரன் எடுத்து ஆட்டம் இழக்காமல் இருந்தார். ஷிகர் தவான் 94 ரன்னில் ஆட்டமிழந்தார். முன்னதாக இலங்கை அணி தனது முதல் இன்னிங்சில் 294 ரன்களுக்கு ஆட்டமிழந்தது. இதன் மூலம் 122 ரன் முன்னிலையை அந்த அணி பெற்றது. இன்று கடைசி நாள் ஆட்டம் நடைபெறும் நிலையில் இந்திய அணி 49 ரன் முன்னிலை பெற்றிருந்தது.

இன்று காலை போட்டித் தொடங்கியதும் 79 ரன் எடுத்த நிலையில் லக்மல் பந்தில் போல்டானார் ராகுல். புஜாரா (22) வும் லக்மல் பந்துவீச்சில் பெரேராவில் கேட்ச் கொடுத்து அவுட்டாக, அடுத்து வந்தார் கேப்டன் கோலி. அவர் நிலைத்து நின்று ஆடினாலும் மறுமுனையில் ரஹானே (0), ஜடேஜா (9), அஸ்வின் (7) சாஹா (5) என வருவதும் போவதுமாக இருந்தனர்.  கோலியும் புவனேஷ்வர் குமாரும் (7 ரன்) களத்தில் உள்ளனர். நண்பகல் 1.18 மணி நிலவரப்படி, இந்திய அணி 7 விக்கெட் இழப்புக்கு 320 ரன்கள் எடுத்திருந்தது. கோலி 86 ரன்களுடன் செஞ்சுரியை நோக்கி சென்றுகொண்டிருந்தார். இந்திய அணி 198 ரன்கள் முன்னிலை பெற்றுள்ளது.

இந்த ஆட்டம் டிராவில் முடிய அதிக வாய்ப்புள்ளது.

சற்று முன்



எடிட்டர் சாய்ஸ்