ஜெயலலிதாவின் மரணம் தொடர்பான விசாரணை ஆணையத்திடம் மனு அளித்துள்ளதாக திமுக மருத்துவர் அணியின் மாநிலத் துணைத் தலைவர் சரவணன் தெரிவித்துள்ளார்.

மறைந்த முன்னாள் முதலமைச்சர் ஜெயலலிதா மரணம் தொடர்பான விசாரணை, ஓய்வு பெற்ற நீதிபதி ஆறுமுகசாமி தலைமையில் நடைபெற்று வருகிறது. இந்த விசாரணையை சென்னையில் உள்ள எழிலகத்தில் இருந்து மேற்கொண்டு வரும் ஆறுமுகசாமி, இதுதொடர்பான ஆவணங்களை தபால் மூலமும், மனுக்களை விசாரணை ஆணையத்திடமும் ஒப்படைக்கலாம் என தெரிவித்திருந்தார். இதையடுத்து 15க்கும் மேற்பட்ட தபால்கள் விசாரணை ஆணையத்திற்கு வந்ததாக தெரிவிக்கப்பட்டது.

இந்நிலையில் ஜெயலலிதாவின் மரணம் தொடர்பாக திமுக நிர்வாகி சரவணன் விசாரணை ஆணையத்திடம் மனு அளித்துள்ளார். அந்த மனுவில் ஜெயலலிதாவிற்கு சிகிச்சை அளித்த மருத்துவர்கள் பட்டியலில் பல்வேறு குளறுபடிகள் ஏற்பட்டுள்ளன என்று குறிப்பிட்டுள்ளார். எனவே விசாரணை ஆணையத்தில் வேறு மாநில மருத்துவக் குழுவை அமைக்க வேண்டும் என்று வலியுறுத்தியுள்ளார். ஜெயலலிதாவிற்கு சிகிச்சை அளித்த மருத்துவர்கள் பட்டியலில் பாலாஜியின் பெயர் இல்லை என்றும், 4 தொகுதி தேர்தலுக்கு 20 கைரேகைகள் மட்டுமே பெற வேண்டிய சூழலில், 28 கைரேகைகள் பெறப்பட்டுள்ளதாகவும் அவர் சுட்டிக்காட்டியுள்ளார். அப்போலோ செய்திக்குறிப்புக்கும், மருத்துவ அறிக்கைக்கும் முரண்பாடுகள் அதிகம் உள்ளன என்றும் சரவணன் அம்மனுவில் தெரிவித்துள்ளார்.