தோனிக்காக தர்ணா போராட்டம் செய்யவும் தயார்... கலகல கவாஸ்கர்

கிரிக்கெட் போட்டிகளில் இருந்து ஓய்வு பெறுவதாக மகேந்திரசிங் தோனி அறிவித்தால், அவரது வீட்டு முன் தர்ணா போராட்டத்தில் ஈடுபடுவேன் என்று இந்திய அணியின் முன்னாள் கேப்டன் சுனில் கவாஸ்கர் கருத்து தெரிவித்துள்ளார்.

இந்திய அணியின் சிறந்த கேப்டன்களுள் ஒருவராகக் கருதப்படும் மகேந்திரசிங் தோனி, கேப்டன் பொறுப்பிலிருந்து விலகுவதாக நேற்று அறிவித்தார். அதேநேரம் ஒரு வீரராக இந்திய அணிக்காக விளையாட தோனி முடிவு செய்துள்ளார். தோனியின் இந்த முடிவு இந்திய கிரிக்கெட் ரசிகர்கள் மட்டுமல்லாது உலகம் முழுவதுமுள்ள கிரிக்கெட் ரசிகர்கள் அதிர்ச்சி அடைந்துள்ளனர். தோனியின் இந்த முடிவு குறித்து கருத்து தெரிவித்துள்ள இந்திய அணியின் முன்னாள் கேப்டன் சுனில் கவாஸ்கர், கேப்டன் பதவியிலிருந்து தோனி ஓய்வுபெற்று விட்டாலும், ஒரு வீரராக இந்திய அணியில் அவர் தொடர வேண்டும். ஒருசில ஓவர்களில் ஆட்டத்தின் போக்கையே மாற்றக்கூடிய அபாயகரமான பேட்ஸ்மேனான தோனியின் சேவை இந்திய அணிக்கு தேவை. ஒருவேளை அவர் ஓய்வுபெறுவதாக அறிவித்தால், கிரிக்கெட் போட்டிகளில் மீண்டும் பங்கேற்கக் கோரி அவர் வீட்டு முன் தர்ணா போராட்டத்தில் ஈடுபடும் முதல் ஆளாக நான் இருப்பேன் என்று அவர் தெரிவித்துள்ளார்.