அரசு மீது வைக்கப்படும் அடிப்படை ஆதாரமற்ற குற்றச்சாட்டுகளுக்கு எல்லாம் பதில் கூறி காலத்தை வீணடிக்க விரும்பவில்லை என முதலமைச்சர் எடப்பாடி பழனிசாமி தெரிவித்துள்ளார்.

புதுக்கோட்டையில் நடைபெற்ற எம்.ஜி.ஆர்.நூற்றாண்டு விழாவில் கலந்துகொண்டு பேசிய முதலமைச்சர், டெங்கு காய்ச்சலை கட்டுப்படுத்த முழு வீச்சில் பணிகள் மேற்கொள்ளப்பட்டு வருவதாக கூறினார். மேலும், டெங்குவை ஒழிக்க பொதுமக்களும் போதிய ஒத்துழைப்பு நல்க வேண்டும் எனக் கேட்டுக்கொண்டார். ‌விழாவில் புதுக்கோட்டை மாவட்டத்திற்கு 619 கோடியே 7 லட்சம் ரூபாய் மதிப்பீட்டில் பல்வேறு புதிய திட்டங்களை முதலமைச்சர் தொடங்கிவைத்தார். மேலும், ‌இலுப்பூர் மற்றும் பொன்னமராவதி பேரூராட்சிகள் நகராட்சிகளாக தரம் உயர்த்தப்படும் என உறுதியளித்தார்.

நிகழ்ச்சியில் பேசிய மக்களவை துனைத் தலைவர் தம்பிதுரை, தமிழகத்தில் அரசியல் வெற்றிடம் ஏற்பட்டுவிட்டதாக கருதி கலைத்துறையினர் சிலர் அரசியலுக்கு வர முயல்வதாகவும், அவர்களை மக்கள் ஏற்க மாட்டார்கள் எனவும் தெரிவித்தார். விழாவில் துணை முதலமைச்சர் ஓ.பன்னீர்செல்வம், சபாநாயகர் தனபால் மற்றும் அமைச்சர்கள் கலந்துகொண்டனர்.